ஐக்கிய அமரகத்தை சேர்ந்த ஆட்குறைப்பில் ஈடுபடவுள்ளதாக வெளியாகியுள்ள தகவல் அங்கு வசிக்கும் இந்தியர்களை அதிர்ச்சிக்குள்ளாக்கியுள்ளது

உலக நாடுகள் முழுவதிலும் கொரோனா வைரஸ் கோரதாண்டவம் ஆடி வருகிறது. கொரோனா தடுப்பு நடவடிக்கையாக உலக நாடுகள் பலவும் ஊரடங்கை அறிவித்ததால் தொழிற்சாலைகள், நிறுவனங்கள் உள்ளிட்டவைகள் இயங்காமல் இருந்தது. இதன் காரணமாக வெளிநாடுகளுக்கு பணி நிமித்தமாக சென்றவர்கள் வேலையிழந்து கடுமையாக பாதிக்கப்பட்டுள்ளனர்.

மாதக் கணக்கில் அறிவிக்கப்பட்ட பொது முடக்கத்தால், பொது மக்களின் பொருளாதாரம், வாழ்வாதரம் உள்ளிட்டவைகள் கடுமையாக பாதிக்கப்பட்டுள்ளன. பொருளாதாரம் முடக்கப்பட்டதால் பல கோடி மக்கள் வேலையின்றி தவிக்கும் நிலை ஒருபுறம் இருக்க, ஊதிய பிடித்தமும் ஆட்குறைப்பும் பெரு நிறுவனங்களால் செயல்படுத்தப்பட்டு வருகிறது. பணி நீக்கங்கள் தொடர் கதையாகி வருகிறது. ஊழியர்கள் தாங்களாகவே ராஜினாமா செய்ய வற்புறுத்தப்பட்டு வருகிறார்கள்.

இந்த நிலையில், ஐக்கிய அரபு அமீரகத்தில் உள்ள 500 க்கும் மேற்பட்ட நிறுவனங்களில் தனியார் நிறுவனம் ஒன்று ஆய்வு மேற்கொண்டது. அதில், கொரோனா பாதிப்பு காரணமாக 30 சதவீத நிறுவனங்கள் ஊழியர்களை குறைக்க இருப்பதாக தெரியவந்துள்ளது. இதுமட்டுமல்லாமல் 30 சதவீத நிறுவனங்கள் தங்கள் ஊழியர்களின் சம்பளத்தை சராசரியாக தலா 10 சதவீதம் குறைக்கவும் திட்டமிட்டுள்ளதாக தெரிவிக்கப்பட்டுள்ளது.

ஏற்கனவே, சில நிறுவனங்கள் தங்களது ஊழியர்களின் சம்பளத்தை 50 சதவீதம் வரை குறைத்துள்ளது. ஒரு சில நிறுவனங்கள் ஏற்கனவே தங்களிடம் வேலை செய்து வரும் ஊழியர்களை குறைத்துள்ளன. அப்படி வேலையை இழந்தவர்களுக்கு வேறு நிறுவனங்களில் வாய்ப்பு கிடைப்பது கடும் சிரமமாக உள்ளது. ஒருவேளை வேலைக்கு சேர்ந்தாலும் அவர்கள் வாங்கி வந்த சம்பளத்தை விட குறைவாகவே கிடைப்பதாகவும் அந்த ஆய்வில் குறிப்பிடப்பட்டுள்ளது.

அத்துடன் வருகிற டிசம்பர் மாதம் வரை சில நிறுவனங்கள் தங்களது ஊழியர்களுக்கு 75 சதவீதம் மட்டுமே சம்பளத்தை வழங்கவுள்ளது. இதனால், செலவுகளை எப்படி சமாளிப்பது என்று தெரியாமல் திணறி வரும் சிலர், அவர்களது குடும்பத்தை சொந்த ஊர்களுக்கே திருப்பி அனுப்பி வைப்பதாகவும் அந்த ஆய்வில் தெரிவிக்கப்பட்டுள்ளது. ஐக்கிய அரபு நாடுகளில் பெரும்பாலும் இந்தியர்களே பணி புரியும் நிலையில், இந்த ஆய்வின் முடிவுகள் அவர்களை அதிர்ச்சியில் ஆழ்த்தியுள்ளது.