வோடாபோன் ஐடியா நிறுவனம் அதன் ப்ரீபெய்ட் பயனர்களுக்காக வீக்கெண்ட் டேட்டா ரோல்ஓவர் எனும் நன்மையை அறிமுகம் செய்துள்ளது.. இதனால் என்ன பயன்... இது எந்தெந்த திட்டங்களின் கீழ் அணுக கிடைக்கும்... இதோ முழு விவரங்கள்...

வி (வோடாபோன் ஐடியா) இப்போது அதன் ப்ரீபெய்ட் பயனர்களுக்கு ‘வீக்கெண்ட் டேட்டா ரோல்ஓவர்’ நன்மையை வழங்கி வருகிறது. இந்த புதிய விளம்பர சலுகையானது இன்று, அக்டோபர் 19, 2020 முதல் ஜனவரி 17, 2021 வரை செல்லுபடியாகும் என்றும் வி நிறுவனம் குறிப்பிட்டுள்ளது.

வீக்கெண்ட் டேட்டா ரோல்ஓவர் நன்மையானது ரூ.249 அல்லது அதற்கு மேற்பட்ட அன்லிமிடெட் ப்ரீபெய்ட் திட்டங்களுக்கு மட்டுமே பொருந்தும் என்றும் கூறப்படுகிறது.

இந்த நன்மை, பயனர்கள் திங்கள் மற்றும் வெள்ளி ஆகிய தினங்களுக்கு இடையே பயன்படுத்தப்படாத எல்லா டேட்டாவையும் வார இறுதி வரை முன்னோக்கி கொண்டு செல்ல அனுமதிக்கும்.

சேமித்த டேட்டாவைப் பயன்படுத்தி, பயனர்கள் எச்டி ஸ்ட்ரீமிங்கை அனுபவிக்க முடியும் அல்லது வார இறுதி நாட்களில் அதிக அளவிலான பதிவிறக்கங்களை நிகழ்த்த முடியும். ஏனெனில் அவர்கள் பொதுவாக அலுவலக வேலையில் இருந்து வார இறுதியில் தான் விடுபடுகிறார்கள்.

இருப்பினும், வார இறுதி நாட்களில் திரட்டப்பட்ட டேட்டாவானது வார இறுதி முடிந்ததும் காலாவதியாகும் என்பதை கவனத்தில் கொள்ள வேண்டும்.

இந்த ‘வீக்கெண்ட் டேட்டா ரோல்ஓவர்’ நன்மை பயனர்களுக்கு கூடுதல் செலவின்றி கிடைக்கிறது மற்றும் மேலே குறிப்பிட்டுள்ளபடி, ரூ.249 மற்றும் அதற்கு மேற்பட்ட விலையில் உள்ள ஏதேனும் ஒரு திட்டத்துடன் நீங்கள் ரீசார்ஜ் செய்திருக்க வேண்டும்.

எடுத்துக்காட்டாக, ஒரு பயனர் குறிப்பிட்ட வி திட்டத்தை பயன்படுத்துகிறார் என்றால், அதன் வழியாக அவர் தினசரி 2 ஜிபி அளவிலான டேட்டாவை பெறுகிறார்கள் என்றால், திங்களன்று கிடைக்கும் 2 ஜிபியில் அவர் 1 ஜிபி மட்டுமே பயன்படுத்தினர் மற்றும் அடுத்த நாட்களிலும், அவர் அதே அளவு டேட்டாவை மட்டுமே பயன்படுத்துகிறார் என்றால், வார இறுதியில், அவருக்கு தினசரி ஒதுக்கீட்டின் மேல் பதிவிறக்கம் மற்றும் ஸ்ட்ரீம் செய்ய கூடுதலாக 5 ஜிபி டேட்டா இருக்கும்.

சுவாரசியமாக வி நிறுவனம், இந்த நன்மையின் கீழ் வார இறுதியில் குவியக்கூடிய டேட்டா அளவு குறித்து எந்த வரம்புகளையும் வைக்கவில்லை. ஆகவே, ஒரு பயனர் வாரம் முழுவதும் தனது டேட்டாவை பயன்படுத்தவில்லை என்றாலும் கூட, வார இறுதியில் முழுமையான மீதமுள்ள டேட்டா நன்மையை பெறுவார்கள்.

பயனர்கள் இந்த ‘வீக்கெண்ட் டேட்டா ரோல்ஓவர்’ நன்மையின் கீழ் திரட்டப்பட்ட டேட்டாவின் அளவை சரிபார்க்க, Vi மொபைல் ஆப்பில் உள்ள Active Packs & Services பிரிவுக்கு செல்லலாம். அல்லது *199# என்கிற SSD குறியீட்டைப் பயன்படுத்துவதன் மூலமும் அதை சாத்தியப்படுத்தலாம்.

Vi நிறுவனத்திடம் இருந்து டபுள் டேட்டா ப்ரீபெய்ட் திட்டங்களின் கீழ் உள்ள பயனர்களும் இந்த ‘வீக்கெண்ட் டேட்டா ரோல்ஓவர்’ நன்மையை பெறுவார்கள். தகுதிவாய்ந்த திட்டத்துடன் புதிய ரீசார்ஜை செய்வதற்கும் பழைய திட்டத்தின் காலாவதிக்கும் இடையே இடைவெளி இருந்தால், திரட்டப்பட்ட டேட்டா பறிமுதல் செய்யப்படும் என்பதும் இங்கே குறிப்பிடத்தக்கது.

‘வீக்கெண்ட் டேட்டா ரோல்ஓவர்’ நன்மையானது பல நுழைவு நிலை ப்ரீபெய்ட் திட்டங்களான ரூ.249, ரூ.297, ரூ.299, ரூ.398, ரூ.399, ரூ.599, ரூ.299, ரூ.449, ரூ.699, ரூ.595 ஆகியவைகளிலும், ரூ.819, ரூ.1197, ரூ.2399 மற்றும் ரூ.2595 உள்ளிட்ட உயர்மட்ட ப்ரீபெய்ட் பேக்குகளிலும் அணுக கிடைப்பதாக வி நிறுவனம் பட்டியலிட்டுள்ளது.

குறிப்பு: படங்கள் அனைத்தும்  மாதிரிக்காக / உதாரணத்திற்காக வழங்கப்படுபவையே