அதன் தற்போதைய ஜியோபோன் வாடிக்கையாளர்களுக்கு ரிலையன்ஸ் ஜியோ அறிமுகம் செய்துள்ள புதிய ரூ.749 திட்டத்தை ரீசார்ஜ் செய்வது நல்லதா இல்லையா, வாருங்கள் அலசலாம்.முகேஷ் அம்பானி தலைமையிலான ரிலையன்ஸ் ஜியோ நிறுவனம் அதன் புதிய ஜியோபோன் பயனர்களுக்கான இரண்டு திட்டங்களையும், ஏற்கனவே உள்ள ஜியோபோன் வாடிக்கையாளர்களுக்கு புதிய ரூ.749 திட்டத்தையும் நேற்று அறிமுகப்படுத்தியது.

400 மில்லியனுக்கும் அதிகமான பயனர்களைக் கொண்ட நாட்டின் மிகப்பெரிய தொலைத் தொடர்பு ஆபரேட்டரான ஜியோவின் ஜியோபோன் சந்தாதாரர் தளம் கடந்த மூன்று ஆண்டுகளில் 100 மில்லியனை எட்டியுள்ளது.

மேலும் இந்த டெலிகாம் நிறுவனம் "2G-MUKT BHARAT" என்கிற ஒரு புதிய இயக்கத்தையும் தொடங்குகிறது, இதன் கீழ் போட்டி டெல்லிகாம் நிறுவனங்களின் அனைத்து பீச்சர் போன் பயனர்களையும் ஜியோபோன் பயனர்களாக மாற்றுவதே நிறுவனத்தி நோக்கமாகும்.

இதற்காக புதிய பயனர்களை ஈர்க்க, ஜியோ நிறுவனம் ரூ.1,999 மற்றும் ரூ.1,499 என்கிற இரண்டு புதிய ஜியோபோன் 2021 ஆபர்களை கொண்டு வந்துள்ளது.

அதே நேரத்தில், ஏற்கனவே இருக்கும் ஜியோ போன் பயனர்களுக்கான ரூ.749 திட்டம் அறிமுகம் செய்யப்பட்டுள்ளது. இந்த கட்டுரையில், புதிய ரூ/749 திட்டத்தை ரீசார்ஜ் செய்வது நல்லதா இல்லையா என்பதை பற்றி விரிவாக பார்க்க உள்ளோம்.

முதலில் ஜியோ ரூ.749 திட்டத்தின் நன்மைகளை பற்றி பார்த்து விடுவோம்!

ரூ.749 திட்டத்துடன், ஜியோபோன் பயனர்கள் ஒவ்வொரு மாதமும் 2 ஜிபி அளவிலான அதிவேக டேட்டாவுடன், எந்த எஃப்யூபி வரம்பும் இல்லாமல் வரம்பற்ற வாய்ஸ் காலிங் நன்மையைப் பெறுவார்கள்.

இந்த திட்டத்தின் செல்லுபடியாகும் 12 மாதங்கள் ஆகும். இந்தத் திட்டம் மாதாந்திர அடிப்படையில் எஸ்எம்எஸ் சலுகைகளையும் வழங்கக்கூடும், ஆனால் ஜியோ நிறுவனம் இந்த நன்மையை இன்னும் வெளிப்படுத்தவில்லை.

இந்த சலுகை மார்ச் 1 ஆம் தேதி அணுக கிடைக்கும் என்பதால், ரிலையன்ஸ் ஜியோ முழு இதன் நன்மைகளையும் நாளை (அதாவது பிப்ரவரி 28 ஆம் தேதி) வெளிப்படுத்தும் என்று நம்புகிறோம். இந்த திட்டத்தின் பயனர்கள் JioTV, JioCinema போன்ற Jio பயன்பாடுகளுக்கும் இலவச அணுகலைப் பெறுவார்கள்.

சரி.. JioPhone பயனர்களுக்கான ஜியோ ரூ.749 திட்டத்தை ரீசார்ஜ் செய்வது லாபமா?

முன்னரே குறிப்பிட்டுள்ளபடி ரிலையன்ஸ் ஜியோவின் ரூ. 749 ஜியோ போன் திட்டமானது மாதத்திற்கு 2 ஜிபி டேட்டாவை வழங்குகிறது. ஜியோபோன் பயனர்கள் ஆல் இன் ஒன் திட்டங்களை ரூ.75, ரூ.125, ரூ.155 மற்றும் ரூ.185-க்கு ரீசார்ஜ் செய்யலாம். 

ரூ.749 ஆனது ஒரு ஆண்டு திட்டம் என்பதால் இது மாதமும் 2 ஜிபி அதிவேக டேட்டாவை வழங்கும். ஆகமொத்தம் 24ஜிபி அளவிலான மொத்த டேட்டாவை வழங்கும்.

ரூ.75 ஜியோபோன் ஆல் இன் ஒன் திட்டமானது 3 ஜிபி அளவிலான டேட்டாவை 28 நாட்கள் என்கிற செல்லுபடியின் கீழ் வழங்குகிறதஹு.

முன்னதாக, ஜியோ நிறுவனம் ரூ.49 ஜியோபோன் திட்டத்தை வழங்கியது, அது 2 ஜிபி அளவிலான 4 ஜி டேட்டாவை 28 நாட்களுக்கு வழங்கியது. இருப்பினும் ரூ.49 திட்டம் இனி கிடைக்காததால், புதிய ரூ.749 திட்டத்துடன் நாம் ரூ.75 ஆல் இன் ஒன் திட்டத்தை மட்டுமே ஒப்பிட்டு பார்க்க முடியும்.

ஒரு வருடத்திற்கு, ஜியோபோன் பயனர்கள் ரூ.75 திட்டத்தை 13 முறை ரீசார்ஜ் செய்ய வேண்டும், ஏனெனில் திட்டத்தின் செல்லுபடியாகும் காலம் 28 நாட்கள் மட்டுமே ஆகும். இதன் பொருள் தனித்தனியாக ரீசார்ஜ் செய்தால் மொத்தமாக ரூ.975 செலவாகும்.

இந்த இடத்தில் புதிய ரூ.749 திட்டம் குறைந்த விலையை அதே செல்லுபடியை வழங்குகிறது ஆனால் சற்றே குறைந்த மொத்த டேட்டா நன்மையை வழங்குகிறது. ஆக ஒவ்வொரு நன்மையிலும், ஜியோபோன் பயனர்களுக்கான ரூ.749 திட்டம் ஒரு பொருளாதார விருப்பமாக திகழ்கிறது.

புதிய பயனர்களுக்கான ஜியோபோன் 2021 சலுகைகளின் விவரங்கள்:

மறுகையில் உள்ள புதிய பயனர்களுக்கான ஜியோபோன் 2021 சலுகை இரண்டு திட்டங்களாக பிரிக்கப்பட்டுள்ளது. ரூ.1,999 க்கு, புதிய பயனர்கள் வரம்பற்ற குரல் அழைப்புகள், வரம்பற்ற தரவு (ஒவ்வொரு மாதமும் 2 ஜிபி அதிவேக டேட்டா) கொண்ட ஜியோபோனைப் பெறுகிறார், மேலும் அவர்கள் அடுத்த 2 ஆண்டுகளுக்கு ரீசார்ஜ் தேவையில்லை.

அதுவே ரூ.1,499 திட்டத்தை ஒருவர் தேர்வு செய்தால், பயனர்கள் மேலே உள்ள அதே நன்மைகளைப் பெறுகிறார், ஆனால் 2 ஆண்டுகளுக்கு பதிலாக, நீங்கள் அதை ஒரு வருடத்திற்கு (அதாவது 12 மாதங்கள்) மட்டுமே பெறுவீர்கள்.

ஜியோவைப் பொறுத்தவரை, இதே நன்மைக்காக, வாடிக்கையாளர்கள் மற்ற நெட்வொர்க்குகளில் 2.5 மடங்கு அதிகமாக செலுத்துகிறார்கள். ஒரு பீச்சர் போன் மற்றும் 2 ஆண்டு சேவைக்காக, பிற நெட்வொர்க்குகளில் உள்ள ஒரு பயனர் தற்போது ரூ.5,000 வரை செலவழிக்கிறார், அதே நேரத்தில் ஜியோ அதை ரூ.2000 க்கு வழங்குகிறது என்று நிறுவனம் கூறுகிறது.

2 ஆண்டு வாய்ஸ் சேவைகளுக்கு, ஒருவர் குறைந்தபட்சம் ரூ.149 திட்டத்தை 24 ரீசார்ஜ்களாகப் பிரித்து மொத்தம் ரூ.3600 ஆக மாற்றுகிறார். மேலும் ஒரு பீச்சர் போனின் விலை குறைந்தபட்சம் ரூ.1200 - ரூ.1500 வரை செல்கிறது. ஆகமொத்தம் ரூ.5000 என்று தான் கூறிய கணக்கை ஜியோ நியாயப்படுத்துகிறது.