பிஎஃப் பணம்!

இந்தியாவில் கொரோனா பரவலைக் கட்டுப்படுத்த மார்ச் 25 முதல் ஊரடங்கு அமல்படுத்தப்பட்டது. வீட்டுக்குள்ளேயே முடங்கிக் கிடக்கும் மக்களுக்கு நிதி நெருக்கடி ஏற்பட்டுள்ளதால் அரசு தரப்பிலிருந்து பொருளாதாரச் சலுகைகள் அறிவிக்கப்பட்டன. அதோடு, பிஎஃப் சேமிப்புப் பணத்தை உடனடியாக எடுத்துப் பயன்படுத்த மத்திய அரசு வழிவகை செய்திருந்தது. மார்ச் மாத இறுதியில் மத்திய தொழிலாளர் மற்றும் வேலைவாய்ப்பு அமைச்சகம் வெளியிட்டிருந்த அறிவிப்பில், தொழிலாளர் வைப்பு நிதி உறுப்பினர்கள் திருப்பிச் செலுத்த வேண்டிய அவசியம் இல்லாத முன்தொகையைப் பெற்றுக் கொள்ள அனுமதிப்பதாக அறிவித்தது. அதன்படி, பிஎஃப் பணத்தை அதிகளவில் எடுத்து வருகின்றனர்.

பிஎஃப் தொடர்பான சந்தேகங்கள்!

பொதுவாகவே பிஎஃப் சேமிப்பு தொடர்பாகவும், பணம் எடுப்பது உள்ளிட்ட பல்வேறு விஷயங்கள் குறித்தும் பலருக்கும் சந்தேகம் இருக்கும். அதற்கு எவ்வாறு தீர்வு காண்பது என்பதுகூடத் தெரியாமல் பலர் இருக்கின்றனர். தொழிலாளர் வருங்கால வைப்பு நிதி அமைப்பின் சார்பாக வாடிக்கையாளர் குறைதீர்ப்புச் சேவைகள் பல செயல்படுத்தப்பட்டு வருகின்றன. உமாங் ஆப், EPFiGMS போர்ட்டல், ஃபேஸ்புக், ட்விட்டர் போன்றவை வாயிலாக வாடிக்கையாளர் குறைதீர்ப்பு சேவைகள் 24 மணி நேரமும் வழங்கப்பட்டு வருகின்றன. இருந்தாலும் இவற்றைப் பயன்படுத்துவது பலருக்கு சிரமமாக இருக்கும்.

வாட்ஸ் ஆப் சேவை அறிமுகம்!

பிஎஃப் தொடர்பான பிரச்சினைகளுக்குத் தீர்வு காண மிக எளிதான வாட்ஸ் ஆப் சேவையை வருங்கால வைப்பு நிதி அமைப்பு கொண்டுவந்துள்ளது. இதன் மூலம் வாடிக்கையாளர்கள் அவர்களது பகுதிகளில் உள்ள வருங்கால வைப்பு வைப்பு நிதி அலுவலகத்தை நேரடியாகத் தொடர்பு கொண்டு தங்களது சந்தேகங்களுக்கும் குறைகளுக்கும் எளிதில் தீர்வு காண முடியும். தற்போதைய நிலையில் இந்த வாட்ஸ் ஆப் சேவை பிஎஃப் அமைப்பின் 138 பிராந்திய அலுவலகங்களிலும் நடைமுறைக்கு வந்துள்ளது. இதன் மூலம் அந்தந்தப் பகுதிகளில் உள்ள பிஎஃப் அலுவலகத்துக்கான பிரத்தியேக வாட்ஸ் ஆப் எண்ணைத் தொடர்பு கொண்டு தீர்வுபெற முடியும். வாட்ஸ் ஆப் எண் தொடர்பான விவரங்கள் பிஎஃப் வலைதளத்தில் கொடுக்கப்பட்டுள்ளது.

சென்னைக்கு வாட்ஸ் ஆப் நம்பர் என்ன?

அம்பத்தூர் - 6380131921

சென்னை வடக்கு - 9345750916

சென்னை தெற்கு - 6380366729

தாம்பரம் - 6380153667

தமிழகத்தின் மற்ற நகரங்கள்!

கோயம்புத்தூர் - 9994255012

மதுரை - 9489938487

நாகர்கோவில் - 6381122366

சேலம் - 9080433650

திருநெல்வேலி - 9489987157

திருச்சி - 6380109286

வேலூர் - 7397593330

குறிப்பு: படங்கள் அனைத்தும்  மாதிரிக்காக / உதாரணத்திற்காக வழங்கப்படுபவையே