பற்கள் கறை படிந்தால் அழகான முகமாக இருந்தாலும் புன்னகைக்கும் போது பற்களில் இருக்கும் கறை பார்க்க அசிங்கமாக இருக்கும். இன்னும் சிலருக்கு பற்கள் பழுப்பு நிறத்தில் இருக்கும் பால் போன்ற பற்கள் இல்லையென்றாலும் அதிக பழுப்பு நிற பற்கள் முக அழகை கெடுக்கவே செய்யும். இந்த பிரச்சனை இருப்பவர்கள் வாழைப்பழத்தோலை கொண்டு சரிசெய்ய முடியும்.

தினமும் காலையில் பல் தேய்க்கும் முன்பு வாயை சுத்தமான நீரில் கொப்புளித்து, பிறகு வாழைப்பழத்தோலை கொண்டு பற்களின் மீது தேய்த்து பிறகு பிரஷ் கொண்டு துலக்கினால் பற்கள் பளிச்சிடும். 2015 ஆம் ஆண்டு இது குறித்த ஆய்வு ஒன்றில் வாழைப்பழத்தோலானது பாக்டீரியாவுக்கு எதிராக செயல்படுவது கண்டறியப்பட்டது. இவை பற்களை பளிச் ஆக்குவதோடு ஈறு அழற்சியிலிருந்தும் காக்கிறது. பொதுவாகவே வாரம் ஒருமுறை வாழைப்பழத்தோலை கொண்டு பற்களை தேய்த்துவரலாம்.

சரும அரிப்பு

சிறு பூச்சிகள் கடித்தால் சருமத்தில் எரிச்சலும் தடிப்பும் உண்டாவதுண்டு. குழந்தைகளின் சருமம் மென்மையாக இருக்கும் என்பதால் சாதாரணமாக கொசு கடித்தாலும் சருமத்தில் சிவப்பும், எரிச்சலும் ஏற்படும். வாழைப்பழத்தோலை கொண்டு குழந்தையின் சருமத்தை மென்மையாக தேய்த்து விடும் போது சருமத்தில் இருக்கும் சிவப்பு மறையும். எரிச்சல் இருந்தாலும் குறையதொடங்கும். வாழைப்பழத்தோலில் இருக்கும் ஆண்டிமைக்ரோபையல், ஆக்சிஜனேற்ற எதிர்ப்பு பண்புகளை கொண்டிருக்கிறது. சரும பிரச்சனை சொறி, சிரங்கு, பூச்சிக்கடிக்கு முதலுதவியாக இதை பயன்படுத்தலாம்.

சருமத்தில் அறுவை சிகிச்சை தழும்புகளையும் இவை போக்கவல்லது. ஆனால் அதிக நாட்கள் பயன்படுத்தினால் தான் பலனும் கிடைக்கும். இரவு படுக்கும் போது தழும்புகள் இருக்கும் இடத்தில் தடவி படுக்கவும்.

கால் ஆணி பிரச்சனை

கால் ஆணி பிரச்சனையை ஆரம்பத்தில் கண்டறிந்தால் வாழைப்பழத்தோலை கொண்டே சரிசெய்துவிட முடியும். தினமும் இரவு மூன்று வாழைப்பழத்தோலை கால் பாதத்தின் பக்கம் வைத்து வெள்ளை துணியில் கட்டிவிட வேண்டும். இதே போன்று தொடர்ந்து கட்டி வந்தால் கால் ஆணி குணமாக அதிக வாய்ப்புண்டு. சிகிச்சையோடு இதையும் செய்துவரலாம்.

கால் வறட்சியை போக்க முடியவில்லை என்பவர்களும் வாழைப்பழத்தோலை பாதத்தின் மீது வைத்து அதன் மேல் மெல்லிய துணி கொண்டு கட்டிவிட்டால் பாதம் மென்மையாகும்.

தலைவலி முதல் தசைவலி வரை

ஒற்றைத்தலைவலி இருப்பவர்கள் பொட்டாசியம் நிறைந்த வாழப்பழத்தோலை கொண்டு சுய சிகிச்சை செய்யலாம். வலி உபாதை குறையும். வாழைப்பழத்தோலை ஃப்ரிட்ஜ்ஜில் வைத்து குளிரவைக்கவும். அரை மணி நேரம் கழித்து வாழைப்பழத்தோலை கொண்டு முகத்தின் நெற்றி முதல் கழுத்து வரை ஒற்றி எடுக்கவும். குளிர்ந்த நிலை குறையும் வரை தொடர்ந்து செய்யவும். ஒவ்வொரு தோலையும் குளிர்ந்த நிலை வரை நெற்றி முதல் கழுத்து வரை ஒற்றி எடுக்கவும். நிச்சயம் வலியின் தீவிரம் குறைந்திருக்கும்.

இப்படியும் செய்யலாமா என்று கேட்கலாம் ஆனால் வலிக்கு ஒத்தடம் கொடுப்பது போன்று வாழைப்பழத்தோலை கொண்டு தடவினால் வலி சிட்டாய் பறக்கும் . தடுக்கி விழுந்து அடிபடும் இடத்தில் ரத்தகட்டு ஏற்பட்டால் அதன் மீது வாழைப்பழத்தோலை வைத்து சிறிது நேரம் இலேசாக தேய்த்தபடி இருந்தால் அடிபட்ட இடத்தின் ரத்தகட்டு நீங்கும். வலியும் குறையும்.

முள், கண்ணாடித் துண்டுகளை உடலிலிருந்து வெளியேற்ற

பெரும்பாலும் இது குழந்தைகளுக்கு தரக்கூடிய வலியில்லா சிகிச்சை. காலில் முள், கண்ணாடி உடைந்த இடங்களுக்கு அருகில் செல்லும் போது ஒட்டிக் கொள்ளுதல் போன்ற பிரச்சனைகளுக்கு உள்ளாவதுண்டு.

பொதுவாக சிறிய கூர்மையான பின் போன்ற பொருளை கொண்டுதான் உள்ளிருக்கும் பொருள்களை எடுப்பது வழக்கம். வாழைப்பழத்தோலை உடலில் அந்த பொருள் இருக்கும் இடத்தில் ஒட்டி விட வேண்டும். இரண்டு மணி நேரத்துக்கு அந்த இடத்தை அசையாமல் வைக்க வேண்டும். பிறகு அந்த வாழைப்பழத்தோலை எடுத்து பார்த்தால் முள் தோலில் ஒட்டியிருக்கும் அல்லது சருமத்திலிருந்து வெளியேறும் நிலையில் இருக்கும். வாழைப்பழத்தில் இருக்கும் நொதியானது உடலில் இருக்கும் தூசுகளை தன்னுள் இழுக்கும் தன்மை கொண்டது என்பதால் வலி இல்லாமல் உள்ளிருக்கும் பொருள் வெளியேறும் முள், கண்ணாடித்துண்டுகள் என எதுவாக இருந்தாலும்.

இனி வாழைப்பழத்தோலை தூக்கி போடும் முன்பு பயன்படுத்தி பாருங்க.. இதோடு சருமத்துக்கும், கூந்தலுக்கும் உள்ளுக்கும் கூட பயன்படுத்தலாம். இது குறித்து தொடர்ந்து பார்க்கலாம்.