ஆப்பிளின் செப்டம்பர் நிகழ்வு நடந்து முடிந்து விட்டது, நம்மில் பலர் எதிர்பார்த்தபடி, ஆப்பிள் நிறுவனம் அதன் புதிய ஐபோன்களை அறிவிக்கவில்லை.

ஆக ஆப்பிள் இன்னுமொரு நிகழ்வை நடத்த திட்டமிட்டுள்ளது என்பது தெளிவாகி வருகிறது, அநேகமாக அது அக்டோபரில் நடக்கலாம் மற்றும் அதில் புதிய ஐபோன் 12 தொடர் மாடல்கள் அறிவிக்கப்படலாம் என்று எதிர்பார்க்கப்படுகிறது.

இந்நிலைப்பாட்டில், ஆப்பிள் இந்த ஆண்டு நான்கு புதிய ஐபோன்களை அறிமுகப்படுத்துவதாக வதந்திகள் பரவிய வண்ணம் உள்ளது. இப்போது ஒரு புதிய லீக் தகவல், புதிய ஐபோன் 12 வரிசையில் இடம்பெறவுள்ள நான்காவது மற்றும் மிகச்சிறிய ஐபோனின் பெயரை வெளிப்படுத்தியுள்ளது. அது - ஐபோன் 12 மினி ஆகும்.

கேட்டதும் உற்சாகம் பொங்குகிறது அல்லவா? ஐபோன் 12 மினி எந்த மாதிரியான அம்சங்களை கொண்டிருக்கும்? என்ன மாதிரியான விலை நிர்ணயத்தை பெறும்? போன்ற விவரங்களை அறிய தொடர்ந்து படிக்கவும்.

மிகச்சிறிய ஐபோன் 12 மாடலுக்கு ‘மினி’ என்கிற பெயர் கிடைக்கும் என்கிற தகவலை நம்முடன் பகிர்ந்து கொண்டவர் ட்விட்டர் பயனரான டுவான்ரூயி (DuanRui) ஆவார்.

“மினி” என்று பெயரிடும் திட்டம் புதியதல்ல. ஆப்பிள் அதன் பிரபலமான சாதனங்களான ஐபாட் மினி, ஐபாட் மினி மற்றும் மேக் மினி ஆகியவற்றிற்காக பல ஆண்டுகளாக இதைப் பயன்படுத்துகிறது. எனவே ஐபோன் 12 வரிசையின் கீழ் வெளிவரும் மிகச்சிறிய ஐபோன் “மினி” என்கிற பெயரை தாங்கி வந்தால், அதில் ஆச்சரியப்பட ஒன்றுமே இல்லை.

சிறிய டிஸ்பிளே கொண்ட ஐபோனை விரும்பும் ஏராளமான நுகர்வோர் உள்ளனர். ஆப்பிள் தான் ஏற்கனவே சிறிய டிஸ்பிளே கொண்ட ஐபோன் எஸ்.இ மாடலை சந்தையில் விற்பனை செய்கிறதே என்று நீங்கள் கேட்கலாம்.

ஆனால் அது அவுட்டேட்டட் வடிவமைப்பை கொண்டுள்ளது. எனவே தான் சிறிய 5.4 இன்ச் டிஸ்பிளே கொண்ட ஒரு முதன்மை ஐபோனை விரும்பும் நுகர்வோருக்கு, ஐபோன் 12 மினி ஒரு சிறந்த தேர்வாக இருக்கும்.

ஐபோன் 12 மினி மாடலின் விலை நிர்ணயம் எப்படி இருக்கும்?

முதல் முறையாக, ஆப்பிள் இந்த ஆண்டு 5ஜி ஐபோன்களை அறிமுகப்படுத்தும். இருப்பினும், ஐபோன் 12 மினி 4ஜி மட்டும் மாடலாக இருக்கக்கூடும் என்று பலர் நம்புகிறார்கள். எதுவும் இதுவரை உறுதிப்படுத்தப்படவில்லை, ஆனால் ஐபோன் 12 மினியின் 4 ஜி-ஒன்லி மாடல் நிறைய அர்த்தமுள்ளதாக இருக்கிறது.

ஐபோன் 12 ப்ரோ மற்றும் ஐபோன் 12 ப்ரோ மேக்ஸ் போன்ற சாதனங்கள் சூப்பர்ஃபாஸ்ட் 5ஜி இணைப்பு காரணமாக 100 அமெரிக்க டாலர்கள் என்கிற கூடுதல் செலவை சந்திக்கும்.

இந்த இடத்தில் பட்ஜெட் வாசிகளின் தேவைகளை பூர்த்தி செய்ய வேண்டியிருக்கும் அல்லவா? அதற்காகவே ஐபோன் 12 மினி மாடல் 4ஜி வேரியண்ட்டின் கீழ் மட்டுமே அறிமுகம் செய்யப்படலாம்.

இருப்பினும் எதிர்பார்க்கும் அளவிற்கு குறைந்த விலையின் கீழ் அறிமுகமாகுமா என்று கேட்டால் - நிச்சயமாக இல்லை. ஐபோன் 12 மினி ஆனது 699 அமெரிக்க டாலர்கள் (இந்திய மதிப்பின்படி தோராயமாக ரூ.51,420) என்கிற புள்ளியில் தொடங்கலாம் என்று ஆய்வாளர்கள் நம்புகின்றனர். நினைவூட்டும் வண்ணம், ஐபோன் 11 மாடல் கடந்த செப்டம்பர் 2019-இல் 699 அமெரிக்க டாலருக்கு தான் வெளியானது.

ஐபோன் 12 மினி மாடலில் என்னென்ன அம்சங்களை எதிர்பார்க்கலாம்?

ஐபோன் 12 மினி அலுமினியத்தால் மூடப்பட்டிருக்கும் மற்றும் சமீபத்திய ஆப்பிள் சிலிக்கான்- ஏ 14 பயோனிக் சிப்செட்டுடன் வரும். மேலும் இது OLED டிஸ்பிளே, டூயல் கேமரா அமைப்பு, சிறிய டாப் நாட்ச் வடிவமைப்பு மற்றும் தட்டையான விளிம்புகளுடன், அதாவது ஐபாட் ப்ரோ போன்ற வடிவமைப்புடன் வரலாம்.

ஐபோன் 12 மாடல்கள் எதுவும் சார்ஜருடன் தொகுக்கப்படவில்லை என்று பிரபல ஆய்வாளர் மிங்-சி குவோ கூறுகிறார். எனவே மினி மாடலின் சார்ஜரும் தனியாக விற்கப்படலாம்.

ஐபோன் 12 மினி வெளியீடு எப்போது நடக்கும்?

அதிகாரப்பூர்வ வெளியீட்டு தேதி இன்னும் வெளியிடப்படவில்லை. ஆனால் கடந்த சில நாட்களாக, ஐபோன் 12 நிகழ்வு வருகிற அக்டோபர் 13 ஆம் தேதி நடக்கும் என்று பல அறிக்கைகள் கூறியுள்ளன.

ஐபோன் 12 மினி மற்றும் ஐபோன் 12 அக்டோபர் மாத இறுதியில் விற்பனைக்கு வரும் என்றும் மற்றும் ப்ரோ மாடல்கள் நவம்பரில் எப்போதாவது விற்பனைக்கு வரும் என்றும் தகவல்கள் வெளியாகியுள்ளதால், ஆப்பிளின் அடுத்த அறிமுக நிகழ்வானது அக்டோபர் மாதத்தில் நடப்பதற்கு அதிக வாய்ப்புள்ளது.