வரும் ஜனவரி மாதம் முதல் பேருந்துகளில் டிக்கெட் கட்டணத்தை குறைக்க மாநகராட்சி நிர்வாகம் திட்டமிட்டுள்ளது.கர்நாடக மாநிலம் பெங்களூருவில் BMTC-ன் கீழ் மாநகராட்சி பேருந்துகள் இயங்கி வருகின்றன. அதில் சாதாரண பேருந்துகள், ஏசி பேருந்துகள் உள்ளிட்டவை அடங்கும். இந்நிலையில் ஏசி பேருந்துகள் இயக்கத்தில் பல்வேறு மாற்றங்கள் செய்ய மாநகராட்சி திட்டமிட்டுள்ளது. அதன்படி வரும் ஜனவரி மாதம் முதல் ஏசி பேருந்துகளுக்கான கட்டணம் குறைக்க முடிவு செய்யப்பட்டுள்ளது. இதன்மூலம் புதிய வழித்தடங்களில் இயக்கி பயணிகளின் வருகையை உயர்த்த திட்டமிடப்பட்டுள்ளது.

பெங்களூரு மாநகராட்சியில் மொத்தமுள்ள 860 ஏசி பேருந்துகளில் 70 மட்டுமே தற்போது பயன்பாட்டில் இருக்கின்றன.

அதில் 54 பேருந்துகள் வாயு வஜ்ரா சேவை என்ற பெயரில் விமான நிலையங்களுக்கு இயக்கப்படுகின்றன. கொரோனா நெருக்கடியால் ஏசி பேருந்துகளின் பயன்பாடு பெரிதும் குறைந்துள்ளது. இதனால் அரசுக்கு வருவாய் இழப்பு ஏற்பட்டுள்ளது. இதனைத் தவிர்க்கும் பொருட்டு 70ல் இருந்து 150ஆக ஏசி பேருந்துகளின் பயன்பாடு அதிகரிக்கப்படவுள்ளது. ஐடி நிறுவனங்களின் வழித்தடங்களில் இயக்கப்பட்டு வந்த ஏசி பேருந்துகள் வேறு வழித்தடங்களில் மாற்றம் செய்யப்பட இருக்கிறது.


இதன்மூலம் ஏசி அல்லாத பேருந்துகளில் செல்வோர், ஆப் மூலம் முன்பதிவு செய்து கேப் மற்றும் ஆட்டோக்களில் செல்வோர், வாடகை ஸ்கூட்டர்களில் செல்வோரை ஈர்க்க திட்டமிடப்பட்டுள்ளது. இதுகுறித்து பெங்களூரு மாநகராட்சி போக்குவரத்து கழகத்தின் மேலாண் இயக்குநார் சி.ஷிகா கூறுகையில், எங்களது ஏசி பேருந்துகள் பெரும்பாலும் ஐடி துறை ஊழியர்களுக்காகவே இயக்கப்பட்டு வந்தது.

இந்த சூழலில் ஏசி பேருந்துகளை பிரபலப்படுத்தும் நடவடிக்கையில் ஈடுபடுத்தவுள்ளோம். ஏசி பேருந்து டிக்கெட் கட்டணம் குறைப்பது பற்றி இன்னும் இறுதி முடிவு எடுக்கவில்லை. ஆனால் பிரபலப்படுத்தும் நோக்கில் வரும் ஜனவரி ஒன்று முதல் பெங்களூரு மக்களுக்கு டிக்கெட் கட்டணச் சலுகை அளிக்கப்படும். வழித்தடங்களை மாற்றி அமைத்து தொடர்பாக ஆலோசித்து வருகிறோம்.

கொரோனா ஊரடங்கிற்கு முன்னர் ஏசி பேருந்துகளில் ஐடி நிறுவன ஊழியர்கள் பயணித்து வந்தனர். ஆனால் தற்போது வீட்டிலிருந்தே வேலை பார்த்து வருகின்றனர். மீண்டும் எப்போது அலுவலகங்கள் திறக்கப்படும் என்று தெரியவில்லை. அதுவரை ஏசி பேருந்துகளை இயக்காமல் வைத்திருக்க முடியாது. எனவே மாற்று வழித்தடங்களில் இயக்கி அனைத்து தரப்பு பொதுமக்களையும் கவர நடவடிக்கை எடுக்கப்படும் என்றார்.

கடைசியாக ஜனவரி 2018ல் ஏசி பேருந்துகளின் டிக்கெட் கட்டணத்தை 5 முதல் 37 சதவீதம் வரை குறைத்து பெங்களூரு மாநகராட்சி போக்குவரத்து கழகம் உத்தரவிட்டது. ஆனால் அதே ஆண்டு ஜூலை மாதமே கட்டணக் குறைப்பு வாபஸ் பெறப்பட்டது.