போக்குவரத்து கழகத்தின் நடவடிக்கைக்கு எதிர்ப்பு தெரிவித்து அரசு பேருந்துகளை இயக்க மாட்டோம் என்று தொழிற்சங்கத்தினர் அறிவித்துள்ளனர். புதுச்சேரி மாநில அரசு போக்குவரத்துக் கழகத்தில் நூற்றுக்கணக்கான பேருந்துகள் இயங்கி வருகின்றன. இந்நிலையில் அரசு பேருந்துகளை தனியார் வசம் ஒப்படைக்கவுள்ளதாக போக்குவரத்து கழகம் முடிவு செய்துள்ளது. இதற்கு அனைத்து தொழிற்சங்கத்தினரும் கண்டனம் தெரிவித்தனர். ஏழை, எளிய மக்கள் அதிக அளவில் அரசு பேருந்துகளை நம்பியே இருக்கின்றனர். இந்த சூழலில் அரசு பேருந்துகளை தனியாரிடம் ஒப்படைத்தால் கட்டணம் தாறுமாறாக ஏறக்கூடும். இது சாமானிய மக்களை பெரிதும் பாதிக்கும்.

அதேசமயம் தொழிற்சங்கத்தில் உள்ள ஓட்டுநர்கள், நடத்துநர்கள் வேலை இழக்கும் அபாயம் ஏற்படும் என்று குற்றம்சாட்டினர். எனவே அரசு போக்குவரத்து கழகத்தின் முடிவை உடனடியாக திரும்பப் பெற வேண்டும் என்று கோரிக்கை விடுத்தனர்.

ஆனால் எந்தவித உடன்பாடும் எட்டப்படாததால் நாளை முதல் அரசு பேருந்துகளை இயக்க மாட்டோம். தொடர் வேலைநிறுத்தப் போராட்டத்தில் ஈடுபடவுள்ளதாக தொழிற்சங்கத்தினர் அறிவித்துள்ளனர். இதன் காரணமாக பொதுமக்கள் பெரிதும் பாதிக்கப்படும் சூழல் ஏற்பட்டுள்ளது.

இந்த விவகாரத்தில் புதுச்சேரி அரசு உடனடியாக தலையிட்டு சுமூக தீர்வு காண வேண்டும் என்று வலியுறுத்தப்பட்டுள்ளது. முன்னதாக புதுச்சேரி அரசு ஒப்பந்த ஊழியர்களுக்கு பணி நிரந்தர ஆணை வழங்கப்படும் என்றும், ஊதிய உயர்வு வழங்கப்படும் என்றும் தெரிவிக்கப்பட்டிருந்தது.

 ஆனால் அதற்கான அறிவிப்பு எதுவும் வெளியாகவில்லை. இதைக் கண்டித்து கடந்த வாரம் புதுச்சேரியில் உள்ள சாலைப் போக்குவரத்துக் கழக ஓட்டுநர்கள், நடத்துநர்கள் உள்ளிட்டோர் போக்குவரத்து அலுவலகத்திற்கு முன்பாக போராட்டத்தில் ஈடுபட்டது குறிப்பிடத்தக்கது.