தங்களின் போராட்டத்தை உலகம் முழுவதும் கொண்டு சேர்க்கும் வகையில் ஆன்லைனிலும் விவசாயிகள் களமிறங்கியுள்ளனர்.

மத்திய அரசு கொண்டு வந்துள்ள மூன்று வேளாண் சட்டங்களுக்கு எதிராக ஒரு மாதத்திற்கும் மேலாக விவசாயிகள் தொடர் போராட்டத்தை முன்னெடுத்து வருகின்றனர். இந்த சூழலில் விவசாயிகள் போராட்டத்திற்கு எதிராக சமூக வலைதளங்களில் பாஜகவினர் சிலர் எதிர்மறையான கருத்துகளை பதிவிட்டு வருவதாக சொல்லப்படுகிறது. விவசாயிகளை பிரிவினைவாதிகள் என்றும், தேசத்திற்கு எதிராக செயல்படுகிறார்கள் என்றும் முத்திரை குத்தி வருகின்றனர்.

இதேபோல் பல்வேறு தவறான தகவல்களும் விவசாயிகள் போராட்டத்தை மையப்படுத்தி பரப்பப்பட்டு வருகிறது. இந்த விஷயத்தை பஞ்சாப் மாநிலம் லூதியானாவைச் சேர்ந்த பவ்ஜித் சிங் என்ற இளைஞர் கவனித்துள்ளார். உடனே தனது தகவல் தொழில்நுட்ப நண்பர்களின் உதவியுடன் சேர்ந்து கடந்த ஆண்டு நவம்பரில் @Tractor2twitr என்ற ட்விட்டர் கணக்கைத் தொடங்கியுள்ளார்.

அதில் டெல்லி - ஹரியானா தேசிய நெடுஞ்சாலையில் போராடி வரும் விவசாயிகள் பற்றிய தகவல்கள், போராடும் சூழல், கோரிக்கைகள், விவசாயிகளுக்கு செய்யப்பட்டுள்ள வசதிகள் உள்ளிட்டவை குறித்து நாள்தோறும் பதிவிடப்பட்டு வருகிறது. இந்த கணக்கை 26 ஆயிரத்திற்கும் மேற்பட்டோர் பின் தொடர்ந்து வருகின்றனர்.

இவர்கள் விவசாயிகள் போராட்டம் குறித்த சரியான தகவல்களை மட்டும் உலக மக்களுக்கு எடுத்துரைக்கும் முயற்சியில் ஈடுபட்டுள்ளதாக கூறப்பட்டுள்ளது. சமீபத்தில் #ModiWithFarmers என்ற ஹேஷ்டேக்கிற்கு போட்டியாக #FarmersDyingModiEnjoying என்ற ஹேஷ்டாக்கை ட்ரெண்டாக்கி பரபரப்பை ஏற்படுத்தினர். இந்த ட்விட்டர் கணக்கை அமெரிக்காவின் ஹூஸ்டன், டெக்சாஸ் ஆகிய நகரங்களில் இருக்கும் நண்பர்களும் சேர்ந்து இயக்கி வருகின்றனர்.

சமீபத்தில் கிஷான் ஏக்தா மோர்சா என்ற விவசாய அமைப்புடன் ட்ராக்டர் டூ ட்விட்டர் குழுவினர் கைகோர்த்துள்ளனர். இவர்கள் பேஸ்புக், யூடியூப், வாட்ஸ்-அப், ஸ்நாப்சேட் ஆகிய சமூக வலைதளங்களிலும் கணக்குகளை தொடங்கியுள்ளனர். இதற்காக 50 பேர் கொண்ட குழு செயல்பட்டு வருவது குறிப்பிடத்தக்கது. அனைத்து கணக்குகளிலும் பின் தொடர்பவர்களின் எண்ணிக்கை தொடர்ந்து அதிகரித்து வருகிறது