இராகு, கேது போன்ற நவகிரகங்களால் ஏற்படும் தோஷங்களைக் களைக்க உலக புகழ்பெற்ற பரிகாரத் தலம் ஆந்திர மாநிலத்தின் ஸ்ரீகாளஹஸ்தி. அதே போன்று, தமிழ்நாட்டில் தஞ்சாவூருக்கு அருகே உள்ள கத்திரிநத்தம் ஸ்ரீ காளஹஸ்தீஸ்வரர் கோயிலும் இராகு, கேதுவுக்கான பரிகாரத் தலமாகத் திகழ்கிறது. இது “தென் காளஹஸ்தி” என அழைக்கப்படும் உயர்ந்த புனித தலம்.

புராதனச் சிறப்பும் பாடல் பெற்றத் தலமுமாக

சோழ பேரரசின் மாமன்னன் ராஜராஜ சோழனின் ஆட்சிக் காலத்தில் கட்டப்பட்ட இந்தக் கோயில், அவரது வழிபாட்டுத் தலமாக இருந்தது. திருஞானசம்பந்தர், திருநாவுக்கரசர், சுந்தரர் ஆகிய நால்வரின் தேவாரப் பாடல்களில் இடம்பெற்றதாலும் இத்தலம் பாடல் பெற்ற தலமாக போற்றப்படுகிறது. சிலந்தி, பாம்பு, யானை ஆகியவையும் இங்கே சிவனை வழிபட்டு முக்தி பெற்றதைக் கூறும் புராணக் கதைகளும் உண்டு.

மூலவர் மற்றும் அம்மன்

இக்கோயிலில் சிவன் “காளஹஸ்தீஸ்வரர்” என லிங்க ரூபமாகத் திகழ்கிறார். தஞ்சாவூர் பெருவுடையாரைப் போன்று இந்த லிங்கமும் அகண்ட பாணம், வட்ட பீடம், அரை வட்ட பாண சிகர வடிவில் வடிவமைக்கப்பட்டுள்ளது.
அம்மன் திருநாமம் “ஞானாம்பிகை”. திருக்காளத்தியிலுள்ள அம்மனின் பெயரும் இதுவே. நின்ற கோலத்தில், கையிலே தாமரை மலரும் அகமணியையும் ஏந்தி, அபய வரத ஹஸ்தத்தில் பக்தர்களுக்கு அருள்புரிகிறார்.

சப்தரிஷிகள் வழிபட்ட திருத்தலம்

சப்தரிஷிகளில் பேராற்றலுடைய அத்ரி, வசிஷ்டர், காச்யபர், கெளதமர், பரத்வாஜர், விஸ்வாமித்ரர், ஜமதக்னி ஆகியோர் ஒருகாலத்தில் சாபம் பெற்றபோது, இக்கோயிலின் எதிரே உள்ள திருக்குளத்தில் 48 நாட்கள் தவமிருந்து இறைவனை வழிபட்டனர். அதன் விளைவாக சாபமும் நோய்களும் நீங்கி முக்தியடைந்தனர்.

நவகிரக பிரதிஷ்டை – வைதீக முறையில்

பொதுவாக கோயில்களில் நவகிரகங்கள் ஆகம முறையில் அமைக்கப்படுவதாகும். ஆனால், இங்கு காளஹஸ்தி கோயிலைப் போல் வைதீக முறையில் பிரதிஷ்டை செய்யப்பட்டிருக்கின்றன. இதில் இராகு தெற்கில், அடுத்து அங்காரகன் (செவ்வாய்) அமைந்திருப்பது விசேஷம். இங்கு நவகிரகங்களை வணங்கினால் கிரக தோஷங்கள் நீங்கும் என நம்பப்படுகிறது.

திங்கட்கிழமையில் சிறப்பு பூஜை

ஒவ்வொரு திங்கட்கிழமையும் காலை 7.30 மணி முதல் 9 மணி வரையிலான இராகு காலத்தில் இக்கோயிலில் வழிபடுதல் சிறந்த பலன்களை தரும்.
சர்ப்ப தோஷத்தால் ஏற்படும் திருமண தடை, குழந்தைப் பேறு பிரச்சனை, தொழில் வளர்ச்சி, பதவி உயர்வு, கல்வி இவற்றில் வெற்றி என பல தரப்பிலும் நன்மைகள் கிடைக்கும்.

எப்படி செல்வது?

• இடம்: தஞ்சாவூர் – நாகை சாலையில் 8 கி.மீ. தொலைவில்.
• வழி: புன்னைநல்லூர் மாரியம்மன் கோயிலிலிருந்து தெற்கே சுமார் 2 கி.மீ.
• போக்குவரத்து: தஞ்சாவூர் பழைய பேருந்து நிலையத்திலிருந்து மாரியம்மன் கோயில் வரை பேருந்து, பின்னர் ஆட்டோ அல்லது நடைபயணம்.

நடை திறப்புகள்:

• காலை: 7.00 மணி – 12.00 மணி
• மாலை: 4.00 மணி – 8.00 மணி

அருள்தரும் ஆலயங்கள்