ஏழாம் நூற்றாண்டில், பல்லவ பேரரசின் மன்னர் முதலாம் பரமேஸ்வர வர்மன் ஆட்சிக் காலத்தில், வித்ய வினீத பல்லவர் என்னும் குறுநில மன்னனால் இந்தக் கோவில் கட்டப்பட்டது. அவர் இந்த ஊரில் நிலத்தை விலைக்கு வாங்கி, சிவபெருமானுக்காக இத்திருக்கோவிலை எழுப்பியதாக வரலாறு கூறுகிறது. அதனால் இக்கோவில் “வித்ய வினீத பல்லவ பரமேஸ்வர கிருஹம்” என்ற பெயரால் அழைக்கப்படுகிறது.
தமிழகத்தின் கற்கோயில் கட்டுமானக் கலையின் ஆரம்பகால முன்னோடியாக இத்தலம் திகழ்கிறது. பல்லவ மன்னர்கள் பரமேஸ்வரவர்மன், ராஜசிம்மன், நந்திவர்மன், நிருபதுங்கன் ஆகியோர் இவ்வூரின் மீது தனிப்பட்ட ஈடுபாடு கொண்டு திருப்பணிகள் செய்துள்ளனர். பின்னர் முதலாம் ராஜராஜ சோழன் காலத்தில், இந்த ஆலயம் “பெருந்திருக்கோயில்” என்ற சிறப்புப் பட்டத்தைப் பெற்றது.
இத்தலத்தில் சிவபெருமானுடன் இணைந்து ஆதிகேசவப் பெருமாள் கோவிலும் அமைந்துள்ளது. இது பல்லவர்கள் காலத்தைச் சேர்ந்த வைணவத் திருக்கோவிலாகும். வைணவ சமயத்திற்கு பெரும் தொண்டாற்றிய கூரத்தாழ்வான் இத்தலத்தில் அவதரித்தார். அவருக்கு பெருமாள் கோவிலில் தனிச்சன்னிதி அமைக்கப்பட்டுள்ளது என்பது இத்தலத்தின் இன்னொரு சிறப்பாகும்.
தினமும் மாலை வேளையில், சூரியன் மறையும் சமயத்தில் சூரிய கதிர்கள் நேராக சிவலிங்கத்தின் மீது விழும் வகையில் இந்த ஆலயம் வடிவமைக்கப்பட்டுள்ளது. இது பல்லவ காலக் கோவில் கட்டுமான அறிவின் உயர்ந்த எடுத்துக்காட்டாகும். மேலும், ஸ்ரீ ராமர் வழிபட்ட புனிதத் தலமாகவும் இத்தலம் போற்றப்படுகிறது.
இக்கோவில், நேர்த்திக்கடன் செலுத்தும் பரிகாரத் தலமாக மக்கள் மத்தியில் மிகுந்த நம்பிக்கையை பெற்றுள்ளது. பக்தர்கள் சிவபெருமானுக்கு அபிஷேகம் செய்து, புது வஸ்திரம் சார்த்தி, தங்கள் வேண்டுதல்கள் நிறைவேறியதற்காக நன்றிக்கடன் செலுத்துகின்றனர்.
🙏 அருள் பொழியும் வித்ய வினீத பல்லவ பரமேஸ்வரரின் திருவடிகள் துணை.
கருத்துகள் இல்லை:
கருத்துரையிடுக