பாரம்பரியமாக பயன்படுத்தப்படும் 26 மசாலா பொருள்களைக் கொண்டு ஆய்வு செய்ததில் இலவங்க பட்டையானது மிகச்சிறந்த ஆக்ஸினேற்றியாக செயல்படுவது கண்டறியப்பட்டுள்ளது. பூண்டை காட்டிலும் சக்தி வாய்ந்ததாக சொல்லப்படுகிறது. அதிக சக்தி வாய்ந்த பாலிஃபீனால் ஆக்ஸிஜனேற்றங்களை கொண்டிருக்கிறது. இவை ஆக்சிஜனேற்றத்தால் உடலுக்கு ஏற்படும் சேதங்களை தடுக்க உதவுகிறது. வாரம் ஒருமுறையாவது தேநீரில் அல்லது பட்டை தூள் சேர்த்த வெதுவெதுப்பான நீரை குடித்துவந்தால் எதிர்ப்பு சக்தி அதிகரிக்கும்.

மூளை செயல்பாடு

உடல் உறுப்புகள் இயங்குவதற்கும் தகவல்களை பரிமாறி உடனடியாக மூளை கட்டளைகள் பிறப்பிப்பதற்கும் மூளையின் செயல்பாடும், நரம்புமண்டலமும் ஆரோக்கியமாக இருக்க வேண்டும். மூளை செல்கள் சேதமடையாமல் அவை சிறப்பாக செயல்பட நரம்புகளில் நிறைவான புரதங்கள் தேவை. இவை நரம்பு மண்டலங்களை தூண்டுவதால் மூளை செல்கள் சேதமடையாமல் காக்கப்படுகிறது.

வயதான பிறகு வரக்கூடிய மறதி என்னும் அல்சைமர், பர்கின்சன் என்னும் நோய், நரம்பியல் நோய்களை தடுக்கிறது. இலவங்கபட்டையானது மூளை செல்களை சேதமடையாமல் பாதுகாக்க உதவுகிறது.

பற்களுக்கு நன்மை

பட்டை நீரை வாய்க்கொப்புளித்துவந்தால் அது வாய்க்கிருமிகளை அழிப்பதோடு சிறந்த இயற்கை மவுத் வாஷாகவும் இருக்கும். பெரும்பாலான பற்பொடிகளிலும், பேஸ்ட்களிலிலும் பட்டையும் முக்கியபொருளாக சேர்க்கப்படுகிறது குறிப்பிடத்தக்கது.

சர்க்கரை நோயாளிகள்

நீரிழிவு தீரா நோய் என்பதால் உரிய மாத்திரைகள் எடுப்பதோடு உணவு வகையிலும் அதிக எச்சரிக்கையோடு இருக்க வேண்டும். சமயங்களில் நீரிழிவு கட்டுப்படுத்தாவிட்டால் வேறுவிதமான பாதிப்பு உண்டாக்கும். நீரிழிவு இருப்பவர்கள் ரத்தத்தில் சர்க்கரை அளவு குறைய நீரில் பட்டையை சேர்த்து கொதிக்க வைத்து குடித்துவரலாம். இதனால் கட்டுப்படாத சர்க்கரை அளவு வேகமாக கட்டுப்படும். பட்டை கணையத்தின் இன்சுலின் சுரப்பை எதிர்க்கும் பண்புகளை குறைத்து இன்சுலின் சுரப்பை ஊக்குவிக்கிறது. ஆய்வு ஒன்றில் தினமும் அரை டீஸ்பூன் அளவு இலவங்கப்பட்டை தூள் சர்க்கரை குறைப்பில் பெருமளவு உதவுவதாக கண்டறியப்பட்டுள்ளது.

இரத்தத்தில் சர்க்கரை அளவு குறைப்பதில் பட்டை சிறப்பாக பயன்படுகிறது.அதே நேரம் சர்க்கரை கட்டுக்குள் இருப்பவர்கள் அதிக அளவு பட்டையை எடுத்துகொண்டால் ரத்தத்தில் சர்க்கரை அளவை மிக வேகமாக குறைத்துவிடும். இதுவும் அபாயகரமானதே என்பதையும் கவனிக்க வேண்டும்.

இதயத்துக்கு நன்மை

உடலில் நல்ல கொழுப்பு கெட்ட கொழுப்பு இரண்டுமே உண்டு. பட்டை உடலில் இருக்கும் மோசமான விளைவுகளை உண்டாக்கும் எல்.டி.எல் என்னும் கேட்ட கொழுப்பின் அளவை குறைக்கிறது. ஆய்வு ஒன்றில் தினசரி பட்டைத்தூளை எடுத்துகொண்டவர்களுக்கு உடலில் இருந்த நல்ல கொழுப்பின் அளவு அதிகரித்தது கண்டறியப்பட்டது.

விலங்குகளை கொண்டு ஆய்வு செய்ததில் பட்டை ரத்த அழுத்தத்தை குறைப்பதையும் கண்டறியப்பட்டது. மொத்தத்தில் இதய நோய் அபாயத்தை குறைப்பதில் பெரிதும் உதவுகிறது பட்டை.

நுரையீரலில் தொற்று

நுரையீரலில் சளி அதிகமாகும் போது சுவாசபிரச்சனை உண்டாகும். இறுக்கமான அடர்த்தியான சளி நுரையீரலுக்குள் தங்கியிருந்தாலும் பட்டை அதை வெளியேற்ற உதவுகிறது. நுரையீரல் சளியை வெளியேற்றும் கைவைத்தியம் எதுவாக இருந்தாலும் அதில் பட்டைதூளை சிறிதளவு சேர்த்தால் பலன் நிச்சயம் கிடைக்கும். மேலும் சளி, காய்ச்சல், இருமல் போன்ற நேரங்களிலும் பட்டைதூளை வெதுவெதுப்பான நீரில் கலந்து குடித்தால் நிவாரணம் விரைவாக கிடைக்கும். இலவங்கபட்டை எண்ணெயையும் பயன்படுத்தலாம்.

சினைப்பை நீர்க்கட்டி

மாதவிடாய் பிரச்சனையை அதிகம் எதிர்கொள்ளும் இளம்பெண்கள் பெருகிவருகிறார்கள். சினைப்பை நீர்க்கட்டிகளால் பாதிக்கப்படுவது அல்லது கர்ப்பப்பை எண்டொமெட்ரியோசிஸ் மற்றும் கர்ப்பபை நார்த்திசுக்கட்டிகள் போன்றவையும் இதற்கு காரணமாக இருக்கிறது. இதனால் மாதவிடாய் காலத்தில் அதிக ரத்தபோக்கை எதிர்கொள்கிறார்கள். இவர்கள் சிகிச்சயோடு உணவில் அதிகம் பட்டை சேர்த்து வந்தால் அதிக இரத்தபோக்கு கட்டுப்படுத்த முடியும். உடல் எடை குறையவும் இவை உதவுகிறது என்று கூறப்படுகிறது.

பட்டையை நீரில் கொதிக்க வைத்து குடிக்கலாம். பட்டையை தூளாக்கி தேனில் குழைத்தும் சாப்பிடலாம்.