உடலில் தேவையற்ற இடங்களில் வளரக்கூடிய முடிகளை நிரந்தரமாக நீக்க முடியாது. அவ்வபோது நீக்குவதில் ஷேவிங், த்ரெட்டிங், வேக்சிங் முறைகள் உண்டு. இதில் வேக்சிங் முறைகள் செய்வது குறித்தும் அவை தரும் நன்மைகள் குறித்தும் அறிவோம்.

இளம்பெண்கள் கண்டிப்பாக செய்யகூடிய அழகு பராமரிப்பில் முக்கியமானது உடலில் இருக்கும் தேவையற்ற முடிகளை களைவதுதான். சரியான முறையில் செய்தால் தான் சருமத்தில் பிரச்சனைகள் வராமல் இருக்கும். அதே போன்று சரியான நேரத்தில் உரிய இடைவேளையில் செய்வதன் மூலம் முடி வளர்ச்சி அதிகரிக்காமலும் பார்த்துகொள்ள முடியும்.

இந்த வேக்சிங் செய்வதன் மூலம் முடியை தற்காலிகமாக நீக்கும் சிறந்த முறை என்கிறார்கள் இதை பயன்படுத்தும் பெண்கள். மெழுகு போன்ற அடர்த்தியாக இருக்க கூடிய பொருளை சூடேற்ற தொடங்கும் போது மெழுகு போன்று இவையும் உருக கூடும். இதில் முடிகளை நீக்கும் சர்க்கரையும் சேர்ந்து இருக்கும். இதுதான் அழகு நிலையங்களிலும் செய்யகூடிய வேக்சிங் முறை ஆகும்.

​வேக்ஸிங் வகைகள்

வேக்சிங் முறையில் நான்குவிதாமன வேக்சிங் தான் பெண்கள் அதிகம் விரும்புகிறார்கள். கோல்ட் வேக்சிங், ஹாட் வேக்சிங், ஸாஃப்ட் வேக்சிங், ஹார்ட் வேக்சிங் போன்ற நான்கு வேக்சிங் முறைகளை தான் பெண்கள் பெரிதும் விரும்புகிறார்கள். இந்த நான்கில் ஒன்றை தேர்வு செய்துகொள்ளலாம்.

வேக்சிங் செய்துகொள்ளும் போது பியர்ல், ஆலோவேரா, கோல்ட் வேக்ஸ் சாக்லேட் வேக்ஸ், போன்ற ஃப்ளேவர்களும் கிடைக்கிறது. அதே போன்று சருமம் வறட்சியான சருமம், எண்ணெய் சருமம், இரண்டும் கலந்த சருமம் என அதற்கேற்ப ,சுகர் வேக்ஸ், க்ரீன் ஆப்பிள் வேக்ஸ், ஸ்ட்ராபெர்ரி வேக்சிங், ரோஸ் வேக்சிங் உண்டு. இந்த வேக்சிஙை எப்படி செய்வது என்பது குறித்து பார்க்கலாம்.

​கோல்ட் வேக்சிங்

இந்த விதமான வேக்சை மிதமான தீயில் வைத்து உருக்கினால் திரவ நிலையில் இருக்கும். இதை முடி இருக்கும் இடங்களில் தடவி விட வேண்டும். இதன் மேல் ஸ்டிக்கர் டைப்பில் வரும் ஸ்ட்ரிப் ஒட்டி கொள்ள வேண்டும். முடிக்கு எதிர்திசையில் வைத்து எடுத்தால் அந்த இடத்தில் இருக்கும் அனைத்து முடியும் வெளிவந்துவிடும். இந்த கோல்ட் வேக்சிங் முறையில் வலி குறைவாக இருக்கும். வீட்டிலேயே செய்து கொள்ளலாம்.

​ஹாட் வேக்சிங்

இந்த ஹாட் வேக்சிங் முறை க்ரீம் வடிவில் இருக்கும். இந்த வேக்ஸை சூடு செய்து சிறிது சிறிதாக முடிகள் இருக்கும் இடங்களில் தடவி முடிகளை நீக்க வேண்டும். இது சற்று வலி கொடுக்க கூடியது. ஆனால் க்ரீம்களை தாராளமாக பயன்படுத்தினால் வலி உணர்வு குறைவாக இருக்கும்.

​ஸாஃப்ட் வேக்சிங்

இது பார்க்க செமி சாலிட் வடிவில் இருக்கும். ஆரம்பத்தில் இதை இலேசாக சூடு செய்து முடி இருக்கும் இடங்களில் தடவி பிறகு துணியை கொண்டு அழுத்தி தேய்த்து இழுக்க வேண்டும். அப்படி செய்யும் போது வலியும் இருக்கும். துணியில் முடி ஒட்டி கொள்ளும். இப்போது ஸாஃப்ட் வேக்சிங் பயன்படுத்தும் போது பேப்பர் வடிவிலன ஸ்ட்ரிப் பயன்படுத்தப்படுகிறது.

​ஹார்ட் வேக்சிங்

ஹார்ட் வேக்சிங் பயன்படுத்தும் போது எதுவுமே தேவையில்லை. அப்படியே இலேசாக சூடு செய்து முடி இருக்கும் இடங்களில் தடவி கொள்ள வேண்டும். பிறகு அவை உலர்ந்ததும். விரல்களால் அதை உரித்து எடுத்தால் முடியோடு சேர்ந்து வெளிவரும். கைகளால் உரித்து எடுப்பதால் இது அதிகமாக வலிக்குமோ என்று பயப்பட வேண்டாம். இவை அதிக வலியை கொண்டிருக்காது.

​வேக்சிங்கால் கிடைக்கும் நன்மைகள்

தேவையற்ற முடிகளை நீக்க ஷேவிங் செய்யும் போது சருமத்தில் நீண்ட நேரம் எரிச்சலை உண்டாக்க வாய்ப்புண்டு. ஆனால் வேக்சிங் முறையில் இந்த எரிச்சல் உணர்வு இருக்காது. வேக்சிங் முறையில் முடிகளை நீக்கும் போது அவை முடியின் ஆழம் வரை சென்று அகற்றுவதால் மீண்டும் முடி வளர்வதற்கு குறைந்தது மூன்று வாரங்கள் முதல் எட்டு வாரங்கள் வரை ஆகலாம். மற்ற முறைகளை காட்டிலும் இம்முறையில் முடி நீக்குவதில் தான் பலன் அதிகம்.

முடிகள் ஆழம் வரை சென்று நீக்குவதால் சருமத்தில் இறந்த செல்களும் நீங்கி அந்த இடம் வழவழப்பாக மென்மையாக மிருதுவாக காட்சியளிக்கிறது. நீண்ட நேரம் செய்ய வேண்டியதில்லை. விரைவாக தேவையற்ற முடிகளை அகற்றிவிட முடியும் என்பதால் இதை ஒரு முறை பயன்படுத்தினால் மீண்டும் இந்த முறையை விரும்ப காரணமும் இதுதான். அதோடு சீரான இடைவெளியில் வேக்சிங் செய்யும் போது அது சருமத்தில் முடி வளர்ச்சியை கட்டுப்படுத்தவும் செய்கிறதும். இவையெல்லாம் விட சமயங்களில் ஷேவிங் க்ரீம் பயன்படுத்தும் போது காயம் உண்டாக வாய்ப்புண்டு. ஆனால் இதில் அப்படியான பிரச்சனையும் இல்லை.

குறிப்பு

நீங்கள் முதல் முறை வேக்சிங் செய்வதாக இருந்தால் சுயமாக செய்யாமல் முதல் முறை சரும பராமரிப்பு நிபுணர் அல்லது அனுபவமிக்க அழகு கலை நிபுணரை நேரில் அணுகு ஆலோசனை பெற்று உங்கள் சருமத்துக்குரியதை தேர்வு செய்ய வேண்டும். முதல் இரண்டு முறை நீங்கள் அவர்களிடமே இதை செய்து கொள்வது பாதுகாப்பானதும் கூட.