பிரபல நடிகர் பிரபாஸின் பெரியப்பா கிருஷ்ணம் ராஜு தமிழகத்தின் ஆளுநராக நியமிக்கப்படக்கூடும் என்று தகவல் வெளியாகியுள்ளது. இதை பார்த்த பிரபாஸ் ரசிகர்கள் கிருஷ்ணம் ராஜுவுக்கு வாழ்த்து தெரிவித்துக் கொண்டிருக்கிறார்கள்.பிரபாஸின் பெரியப்பா கிருஷ்ணம் ராஜு பிரபல தெலுங்கு நடிகர் ஆவார். மூத்த பாஜக தலைவரான கிருஷ்ணம் ராஜு தமிழக ஆளுநராக நியமிக்கப்படக்கூடும் என்கிற தகவல் வெளியாகி தீயாக பரவியுள்ளது. கிருஷ்ணம் ராஜுவை தமிழக ஆளுநராக்குவது என்று மோடி அரசு முடிவு செய்துள்ளதாம். இது குறித்த அறிவிப்பு விரைவில் வெளியாகும் என்று கூறப்படுகிறது.

பன்வாரிலால் புரோகித் தான் கடந்த 2017ம் ஆண்டில் இருந்து தமிழக ஆளுநராக இருக்கிறார். பாஜகவுக்கு விஸ்வாசமாக இருக்கும் கிருஷ்ணம் ராஜுவுக்கு இது பெரிய கவுரவம் என்று கூறப்படுகிறது.

மேற்கு கோதாவரி மாவட்டத்தில் இருக்கும் நரசபுரத்தை சேர்ந்தவர் கிருஷ்ணம் ராஜு. காங்கிரஸ் கட்சியில் சேர்ந்து தன் அரசியல் பயணத்தை துவங்கினார். 1991ம் ஆண்டு நரசபுரம் தொகுதியில் காங்கிரஸ் சார்பில் போட்டியிட்டார். அதன் பிறகு பாஜகவில் சேர்ந்து காக்கிநாடா தொகுதியில் போட்டியிட்டு 1 லட்சத்து 65 ஆயிரம் வாக்குகள் வித்தியாசத்தில் வெற்றி பெற்றார்.

அடல் பிகாரி வாஜ்பேயின் தலைமையிலான என்டிஏ ஆட்சியில் அமைச்சராக இருந்தவர் கிருஷ்ணம் ராஜு. 1999ம் ஆண்டு காக்கிநாடா தொகுதியில் இருந்து மீண்டும் தேர்வு செய்யப்பட்டு லோக்சபாவில் பாஜகவின் கொறடா ஆனார். 2001ம் ஆண்டு மத்திய கேபினட்டில் இடம் பிடித்தார்.

கிருஷ்ணம் ராஜு மட்டும் நியமிக்கப்பட்டால் ரோசையாவை அடுத்து தமிழக ஆளுநரான இரண்டாவது ஆந்திர தலைவர் என்கிற பெருமையை பெறுவார்.

கிருஷ்ணம் ராஜு தமிழக ஆளுநராக நியமிக்கப்படக்கூடும் என்று தகவல் வெளியாவது இது முதல் முறை அல்ல. முன்னதாக கடந்த 2017ம் ஆண்டிலும் அவர் பெயர் அடிபட்டது என்பது குறிப்பிடத்தக்கது.