நடிகர்கள்:

ஆனந்தி,பிரதாப் போத்தன்,இமான் அண்ணாச்சி

இயக்கம்: ராஜசேகர்சினிமா வகை:Dramaகால அளவு:2 Hrs 30 Min

தஞ்சாவூரில் இருக்கும் நடுக்காவேரியை சேர்ந்தவர் கமலி( ஆனந்தி). நடுக்காவேரியில் இருக்கும் அரசுப் பள்ளியில் படித்து வரும் ஆனந்திக்கு பிளஸ் 2 தேர்வில் மாநிலத்தில் முதலிடத்தை பிடித்த அஸ்வினை (ரோஹித் சராப்)பார்த்ததுமே காதல் வந்துவிடுகிறது. அஸ்வினை பார்த்து பேசிப் பழக வேண்டும் என்பதற்காக ஐஐடியில் சேர்ந்து படிக்க முடிவு செய்கிறார் கமலி. அவருக்கு ஓய்வு பெற்ற பேராசிரியரான அறிவுடை நம்பி( பிரதாப் போத்தன்) பயிற்சி அளிக்க ஐஐடியில் படிக்க தேர்வாகிவிடுகிறார்.

படிப்பில் பெரிதாக ஆர்வம் இல்லாத கமலி காதலுக்காக ஐஐடியில் சேர தீவிரமாக படிக்கிறாராம். கமலியின் தந்தை அழகம் பெருமாளுக்கு மகன் படிக்க வேண்டும், மகளை யாருக்காவது திருமணம் செய்து கொடுக்க வேண்டும் என்று தான் எண்ணம். அப்படி ஒரு தந்தையிடம் தான் மேலும் படிக்க விரும்புவதாக சொல்கிறார் கமலி.

காதலுக்காக வராத படிப்பை வம்படியாக படிக்கும் கமலியின் வாழ்க்கையில் என்ன நடக்கிறது என்பது தான் கதை. கண்டதும் காதல், அதற்காக தீவிரமாக படிப்பது, யாராவது திட்டினாலோ, தரக்குறைவாக பேசினாலோ தூங்காமல் படிப்பது, சாதிப்பது என்று கமலி இருப்பது செயற்கையாக இருக்கிறது. காதல் இருக்க வேண்டுமே என்று திணிக்கப்பட்டிருக்கிறது. வில்லன் என்று தனியாக ஒரு ஆள் இல்லாதது ஆறுதல்.

ஹீரோயினை மையமாக வைத்து எடுக்கப்பட்டிருக்கும் படத்தில் ஆனந்தி தன் கண்களால் கதை பேசுகிறார். அப்பாவித்தனமான நடிப்பால் கவர்கிறார். தீனதயாளனின் இசை பக்கபலமாக இருக்கிறது.

பிரதாப் போத்தன், இமான் அண்ணாச்சி, ரோஹித் சராப் ஆகியோர் தங்கள் கதாபாத்திரங்களை உணர்ந்து நடித்திருக்கிறார்கள். அடுத்து என்ன நடக்கும் என்பதை சில இடங்களில் கணிக்க முடிவது, ஊர்ந்து போகும் இரண்டாம் பாதி, கிளைமாக்ஸ் காட்சி படத்திற்கு மைனஸாக அமைந்திருக்கிறது.

திரைக்கதையில் மேலும் கவனம் செலுத்தியிருந்தால் கமலி இன்னும் சிறப்பாக தோன்றியிருப்பாள். கமலி from நடுக்காவேரி, பார்க்கலாம்.