இந்த செய்தியை படித்துவிட்டு உங்கள் எண்ணங்களை கீழே பதிவு செய்யுங்கள்.. இந்த செய்தி பிடித்திருந்தால் உங்கள் நட்பு வட்டத்தில் பகிர்ந்து கொள்ளுங்கள்..
Follow Us:
Twitter: www.twitter.com/Pudhiyapodiyan
Facebook:https://www.facebook.com/Pudhiyapodiayan
Instagram: pudhiya.podiyan
Contact us : oorkodangi@gmail.com
திருநாளைப் போவார் நாயனார் அல்லது
நந்தனார் சைவ சமயத்தவர்களால் பெரிதும் மதிக்கப்படும் அறுபத்து மூன்று
நாயன்மார்களில் ஒருவர் ஆவார்.
திருநாளைப் போவாரின் வாழ்க்கை வரலாறு
ஒரு சிறு குறிப்பு:-
தமிழ்நாட்டில் கொள்ளிட நதியால்
வளம்பெற்ற ஓர் ஊர் ஆதனூர். இவ்வூர்ச் சேரியிலே புலைப்பாடி ஒன்று இருந்தது.
அப்புலைப்பாடியில் வாழ்ந்தவர்களின் தலைவராக ‘நந்தனார்’ என்றோர் நல்லவர் இருந்தார்.
அவர் பிறப்பு அறிவறிந்த காலந்தொட்டு சிவபிரானிடத்து மிகுந்த அன்புடையவரானார்.
திருவடி நினைவன்றி மறந்தும் மற்றைய நினைவு கொள்ளாதவர். அவர் தமது
குலப்பிறப்பிற்கேற்ற கொள்கையால் ‘புறத்தொண்டு’ புரிந்து வந்தவர். கோயில்
பேரிகைகளுக்காக போர்வைத் தோல், விசிவார் என்பன கொடுப்பார். சிவ பெருமானின்
அர்ச்சனைக்காக கோரோசனை கொடுப்பார். பேரன்புப் பெருக்கால் ஆடுதலும் பாடுதலும்
செய்வார்.
ஒருநாள் அருகேயுள்ள
திருப்புன்கூருக்குச் சென்று வழிபட விரும்பினார் நந்தனார். விருப்பம் போன்று
சென்று வாயிலினின்று இசைபாடி நின்றார். அப்பொழுது பெருமானை நேரில்
கும்பிடவேண்டுமென்ற ஆசை பெருகியது. அன்பரின் ஆசையை தீர்க்க நினைத்த பெருமான் நந்தியை
விலகுமாறு செய்து நேரே தரிசனம் அளித்தார். நேர்த்தரிசனம் பெற்றப் பரவசத்தால்
நந்தனார் பணிந்தெழுந்து வீதிவலம் வரும்போது பள்ளமான ஓரிடத்தைக் கண்டார். அவ்விடம்
குளம் தோண்டுவதற்கு அமைவாயிருப்பது கண்டு குளம் அமைத்தார். பின் கோயிலை வலம் வந்து
நடமாடி விடைபெற்று தம்மூர் சேர்ந்தார். இவ்வாறு அயலூர்களிலேயுள்ள திருகோயில்கள்
பலவற்றிற்கும் சென்று திருத்தொண்டு புரிந்து வந்த நந்தனாருக்கு ஒருநாள் தில்லைக்கு
சென்று ஈசனை தரிசனம் செய்யும் ஆசை பெருகியது. அதனால் அன்றிரவு கண்துயிலாது
கழித்தார். விடிந்ததும் தில்லைபதியின் பெருமையையும் தம் குலப் பிறப்பையும்
நினைத்து போவாது தவித்தார். மீண்டும் ஆசை அளவின்றிப் பெருகவே “நாளைப்போவேன்” என்று
கூறி நாட்களைக் கழித்தார். இவ்வாறு நாள் கழிதல் பொறாதவராய் ஒருநாள் தில்லைத்
திருத்தல எல்லையைச் சென்று சேர்ந்தார். சேர்ந்தவர் எல்லையில் வணங்கி நின்று அங்கு
எழும் வேள்விப் புகையைக் கண்டார். வேதம் ஓதும் ஒலியைக் கேட்டார். தாம் பிறந்த
குலத்தினை நினைத்து அதனுள்ளே புகுவதற்கு அஞ்சி நின்றார். ‘அந்தணர் மாளிகைகள்
வேள்வி மண்டபங்கள் நிறைந்த இவ்விடத்தில் எனக்கு அடைதல் அரிது’ என்று கைதொழுது
வலங்கொண்டு சென்றார். இவ்வாறு இரவு பகல் தில்லைத் திருப்பதியை வீதி வலம் வந்தவர்
‘மை வண்ணத் திரு மிடற்றார் மன்றில் நடங்கும் பிடுவது எவ்வண்ணம்?’ என்று எண்ணி
ஏக்கத்துடன் துயில் கொண்டார். ‘இன்னல்தரும் இழி பிறப்பாகிய இது இறைவன் ஆடல்
புரியும் பொன்னம்பலத்தை வழிபடுவதற்குத் தடையாயுள்ளதே?’ என்று வருந்தித் துயில்
கொள்பவராகிய நந்தனாரது வருத்ததைத் நீக்கியருளத் திருவுளங்கொண்ட தில்லைக் கூத்தப்
பெருமான், ‘என்று வந்தாய்’ என்னும் புன்முறுவற் குறிப்புடன் நாளைப் போவாரது கனவில்
தோன்றினார். “இப்பிறவி போய் நீங்க ஏரியினிடை நீ மூழ்கி, முப்புரிநூல் மார்புடன்
முன்னணைவாய்” என மொழிந்து, அவ்வண்ணமே வேள்வித்தீ அமைக்கும் படி
தில்லைவாழந்தணர்க்கும் கனவில் தோன்றி அருள்புரிந்து மறைந்தருளினார்.
அந்நிலையில் தில்லைவாழந்தணர்கள்
விழித்தெழுந்து கூத்தப் பெருமானது கட்டளையினை உணர்ந்து ‘எம்பெருமான் அருள் செய்த
பணி செய்வோம்’ என்று ஏத்திப் பெருங்காதலுடன் வந்து திருத்தொண்டராகிய திருநாளைப்
போவரா அடைந்து, ‘ஐயரே, அம்பலர் திருவடிகளால் உமக்கு வேள்வித் தீ அமைத்துத்
தரவந்தோம்’ என வணங்கினர். தெய்வமறை முனிவர்களும் தெந்திசையின் மதிற்புறத்துத்
திருவாயில் முன்பு தீயமைத்தார்கள். நாளைப்போவார், இறைவன் திருவடிகளை நினைத்து
அத்தீக்குழியினை அடைந்தார். எரியை வலம் கொண்டு கைதொழுது அதனுள்ளே புகுந்து புண்ணிய
மாமுனி வடிவாய் செங்கமல மலரில் உதித்த பிரமதேவனைப் போன்று செந்தீயில் வந்தெழுந்த
அந்தணனாகத் தோன்றினார். அதுகண்டு தில்லை வாழந்தணர்கள் கைதொழுதார்கள். திருத்தொண்டர்கள்
வணங்கி மனங்களித்தார்கள். வேள்வித்தீயில் மூழ்கி வெளிப்பட்ட திருநாளைப் போவாராம்,
மறைமுனிவர் அருமறை சூழ் திருமன்றில் ஆடுகின்ற கழல் வணங்க, தில்லைவாழந்தணர்
உடன்செல்லத் திருக்கோயிலின் கோபுரத்தைத் தொழுது உள்ளே சென்றார். உலகுய்ய நடமாடும்
எல்லையினைத் தலைப்பட்டார். உடன் வந்தோர் யாவரும் அவரைக் காணாதவராயினர்.
நாளைப்போவார் அம்பலவர் திருவடியிற் கலந்து மறைந்தமை கண்டு தில்லைவாழந்தணர்கள்
அதிசயித்தார்கள். முனிவர்கள் துதித்துப் போற்றினார்கள். வந்தணைந்த
திருத்தொண்டராகிய நந்தனாரது வினைமாசறுத்துத் தம்முடைய திருவடிகளைத் தொழுது
இன்புற்றிருக்க அந்தமில்லா ஆனந்தக் கூத்தினர் இப்படியாக அருள் புரிந்தார். இதுவே
நந்தனாராகப் பிறந்து இறுதியில் சிவ பதம் அடைந்த திருநாளைப் போவார் நாயனாரின்
புண்ணிய சரிதம்.
பின்குறிப்பு:-,
“செம்மையே திருநாளைப் போவார்க்கு
அடியேன்” – என்ற வரிகளில் ஆரம்பித்து திருத்தொண்டத் தொகை நந்தனார் பற்றிய
இத்தகவல்களை நமக்குத் தருகிறது.
என்னுடைய வலைத்தளத்தில் வெளிவரும் அனைத்து பதிவுகளுக்கும்
உங்களின் மேலானகருத்துக்கள் வரவேற்கபடுகின்றன. மேலும் இதுபோன்ற எங்களின் பல்வேறு பதிவுகளை
உடனுக்குடன் உங்கள் மின்னஞ்சலில் பெற பதிவு செய்து கொள்ளுங்கள்.
கருத்துகள் இல்லை:
கருத்துரையிடுக