சமீபத்தில் செய்தியாளர்களிடம் பேசிய மத்திய நிதியமைச்சர் நிர்மலா சீதாராமன், வருமான வரி, ஏடிஎம், வங்கி கணக்கில் குறைந்தபட்ச இருப்பு உள்ளிட்ட பல்வேறு சலுகைகளை அறிவித்தார். இந்நிலையில் இன்று மீண்டும் செய்தியாளர்களை சந்தித்த நிதியமைச்சர் நிர்மலா சீதாராமன், ஊரடங்கால் பாதிக்கப்பட்டவர்களுக்கு பல்வேறு சலுகைகளை அறிவித்துள்ளார். இவரது செய்தியாளர் சந்திப்பின் சாராம்சத்தை இங்கே காணலாம்.

ஊரடங்கால் பாதிக்கப்பட்டு உடனடியாக உதவி தேவைப்படுபவர்களுக்கு ரூ.1.7 லட்சம் கோடி அளவிற்கு உதவிகள் வழங்கப்படும்.

காப்பீடு: கொரோனாவிற்கு எதிராக போராடும் மருத்துவர்கள், செவிலியர்கள், சுகாதாரப் பணியாளர்கள், துப்புரவு பணியாளர்களுக்கு ரூ.50 லட்சம் மருத்துவ காப்பீடு அளிக்கப்படும்.

கரிப் கல்யாண் அன்னா யோஜனா: ஏற்கனவே 5 கிலோ அரிசி வழங்கப்பட்ட நிலையில் அடுத்த 3 மாதங்களுக்கு ஒவ்வொரு நபருக்கும் தலா 5 கிலோ கோதுமை/அரிசி வழங்கப்படும். மேலும் ஒவ்வொரு குடும்பத்திற்கும் தலா 1 கிலோ பருப்பு இலவசமாக வழங்கப்படும்.

நேரடி பணப் பரிமாற்ற சேவை மூலம்:

1 - பிரதமர் மந்திரியின் கிசான் திட்டத்தின் கீழ் விவசாயிகளுக்கு ஆண்டிற்கு ரூ.6,000 வழங்கப்பட்டு வருகிறது. இதற்கான முதல் தவணையாக ஏப்ரல் முதல் வாரத்தில் ரூ.2,000 வழங்கப்படும்.

2 - MGNREGA: இந்த திட்டத்தின் கீழ் அளிக்கப்படும் சம்பளம் உயர்த்தி வழங்கப்படும்.

3 - விதவைகள், ஏழை விதவைகள், ஏழைகள், மூத்த குடிமக்களுக்கு தலா ரூ.1,000 இரண்டு தவணைகளில் அளிக்கப்படும்.

4 - பெண்கள் ஜன் தன் யோஜனா: அடுத்த 3 மாதங்களுக்கு தலா ரூ.500 வழங்கப்படும்.

5 - உஜ்வாலா திட்டம்: இந்த திட்டத்தின் கீழ் பதிவு செய்துள்ளவர்களுக்கு அடுத்த மூன்று மாதங்களுக்கு இலவச சிலிண்டர் வழங்கப்படும்.

6 - மகளிர் சுய உதவிக் குழுக்களுக்கு அடமானம் ஏதுமின்றி ரூ.10 லட்சம் வரை கடன் வழங்கப்படும்.

7 - தொழில் நிறுவனங்கள் மற்றும் தொழிலாளர்கள் சார்பில் தலா 12 சதவீத இபிஎஃப் தொகையை மத்திய அரசு அடுத்த 3 மாதங்களுக்கு செலுத்தும் என்று தெரிவித்தார்.