பக்கத்து வீட்டில் குழந்தைகளோடு ஒரு குடும்பம் பசியோடிருக்கும்போது நீயாக ஏதும் செய்யாதே. அரசிடம் கொடுத்துக் கொடுக்க வை என்பது எந்த விதத்திலும் ஏற்புடையதல்ல.
announcement
இதுவரை ஒரு லட்சத்துக்கும் மேற்பட்ட உயிர்களை மருந்தில்லை என்கிற காரணத்தால் கொரோனாவால் இழந்திருக்கிறோம். அதே சமயம், உணவில்லை என்ற காரணத்தால் ஏற்பட்ட இறப்புகள் கொரோனாவின் கணக்கில் சேராதவை. உலகம் முழுக்க அரசும் மக்களும் இணைந்து இந்த பிரச்சினையை எதிர்கொண்டு வரும் நிலையில், உலகம் வியக்கும் வகையில் ஒரு முன்மாதிரி அறிவிப்பை வெளியிட்டிருக்கிறது தமிழக அரசு.
அப்படி என்ன அறிவிப்பு:
“அரசியல் கட்சிப் பிரமுகர்கள், தன்னார்வ நிறுவனங்கள் ஆகியவை தாமாக நிவாரணம் வழங்கக் கூடாது. ஒருவேளை பணமாக தர விரும்புவோர் அதனை முதல்வரின் நிவாரண நிதிக்கும், பொருள்களாக தர விரும்பினால் அதனை மாநகராட்சி ஆணையர், மாவட்ட ஆட்சியர்கள் மூலமாகவே வழங்க வேண்டும்” என்றும் உத்தரவிட்டுள்ளது.
அத்துடன், “ஊரடங்கு உத்தரவை தீவிரமாகச் செயல்படுத்தும் நோக்கில் இந்த ஆணை பிறப்பிக்கப்படுகிறது இதனை மீறி செயல்படுவோர் மீது, ஊரடங்கு உத்தரவை மீறியதாக சட்டப்படி நடவடிக்கை எடுக்கப்படும்" என்று தமிழக அரசு எச்சரித்துள்ளது.
இப்போது நீங்கள் வாசித்தது, உங்கள் புரிதலுக்காக சுருக்கிச் சொல்லப்பட்ட எளிய வடிவம். ஆனால், இது தொடர்பாக அரசு வெளியிட்டிருக்கும் அதிகாரப்பூர்வ செய்தி வெளியீட்டை படிக்கக் கிடைக்கும் வேளை இந்த அறிவிப்புக்குப் பின்னே இருக்கும் அரசியலை உணர முடியும்.
நாடு தவித்துக் கொண்டிருக்கிறது. அடிப்படைத் தொழில்கள் எல்லாம் முடக்கப்பட்டிருக்கின்றன. இந்நிலையில், தினக்கூலிகளாக வாழும் மக்கள் பெருமளவில் இருக்கும் தேசத்தில் அரசே எல்லாவற்றையும் செய்துவிட முடியும் என்ற எண்ணமே பிழையானது.
இந்நிலையில், உதவி செய்து பெயர் வாங்கப்பார்க்கும் அரசியலின் மீது அரசு கவனம் செலுத்துவதும், அதைத் தடுக்கும் முயற்சி என்ற பெயரில், ஒட்டுமொத்தமாக உதவிகளையே செய்ய வேண்டாம் என்று தடை செய்வதும் அரசு இந்தப் பிரச்சினையைக் கையாளும் தொனி மீது கேள்விகளை எழுப்பக்கூடியதாக உள்ளது.
அரசியல் கட்சிகள், சிறிய மற்றும் பெரிய தன்னார்வத் தொண்டு நிறுவனங்கள், தனி விருப்பத்தின்பேரில் தனிநபர்கள் சிலர் என நாள்தோறும் அரசை எதிர்பாராமல் உதவி செய்து வரும் அமைப்புகள் தமிழகம் மட்டுமல்லாது உலகெங்கும் இயங்கி வருகின்றன.
இன்று வேலைக்குப் போனால்தான் இன்றைய உணவு என்ற நிலையிலிருக்கும் அன்றாடங்காய்ச்சி வாழ்க்கை அல்லோலப்பட்டு வரும் நிலையில், அவர்களுக்குப் பேராதரவாக இருக்கும் விஷயங்களில் ஒன்று வீடு தேடி வரும் உணவும், உணவுப்பொருட்களும் தான்.
ஆனால், இதைச் செய்வோர் நாளை தங்கள் அரசியல் லாபத்திற்காக இதனைப் பயன்படுத்தக்கூடும் என்ற அச்சத்திலும், தங்களைத் தவிர யாரும் மக்களின் மனதில் இடம்பெறக்கூடாது என்ற எண்ணத்திலும் இப்படி ஒரு அறிவிப்பை வெளியிட்டிருக்கிறது மாநில அரசு என்று பலதரப்பிலும் விமர்சிக்கப்பட்டு வருகிறது.
குறிப்பாக, அரசு வெளியிட்ட செய்திக்குறிப்பில், நேரடியாகவே, “மக்களுக்கு உதவுவதாகக் கூறிக்கொண்டு சமைத்த உணவையும், உணவுப் பொருட்களையும் பல்வேறு அமைப்புகள் வழங்கி வருகின்றன.” என்ற வார்த்தையால்தான் அமைப்புகள் குறிப்பிடப்படுகின்றன. அப்படியென்றால், அவர்களை எல்லாம் அரசியல் ஆதாயம் பார்க்க இப்போது அடிபோடும் அமைப்புகள் போலப் பார்க்கிறதா அரசு?
பொது விநியோக மையங்கள் வாயிலாக ரூ.1000 வழங்கப்பட்ட போது சமூக இடைவெளி பின்பற்றப்பட்டதை எப்போது உறுதி செய்தது மாநில அரசு? அப்போதும் 144 தடை இருந்ததே?
அத்தியாவசியப் பொருட்கள் வாங்க, இன்று வரையிலும் ரேஷன் கடை வாசலில் கூடும் கூட்டத்தை, அரசு நினைத்திருந்தால் ஒரே ஒரு வாகனம் மூலம் முற்றிலுமாகத் தவிர்த்திருக்க முடியும். அதுகுறித்தும் ஏதும் சிந்திக்கவில்லையே?
பக்கத்து வீட்டில் குழந்தைகளோடு ஒரு குடும்பம் பசியோடிருக்கும்போது நீயாக ஏதும் செய்யாதே. அரசிடம் கொடுத்துக் கொடுக்க வை என்பது எந்த விதத்திலும் ஏற்புடையதல்ல. அது ஒருபோதும் 100% முழுமையாகச் சென்றடையாது என்பதும் கவனிக்கத்தக்கது.
பணமாகத் தர நினைத்தால் அரசு நிதிக்கு, பொருளாகத் தர நினைத்தால் அரசு நிர்வாகிகளிடம். ஒருபோதும் வேறுயாராலும் யாருக்கும் உதவிகள் செல்லக்கூடாது என்று நினைக்கிறதா மாநில அரசு என்பதையும் இங்கு கவனிக்க வேண்டி உள்ளது.
ஆனால், நிச்சயமாக அப்படியல்ல. கடந்த சில நாட்களாக, திமுக உள்ளிட்ட எதிர்க்கட்சிகள் பலவும் தங்கள் தரப்பிலிருந்து பொதுமக்களுக்கு உதவிகளை வழங்கி வருகின்றன. இதனைத் தடுக்கும்பொருட்டு எல்லா உதவிகளையும் தடை செய்திருக்கலாம் என்று அரசியல் வட்டாரங்களில் கருத்துகள் உலவுகின்றன.
பிற அரசியல் கட்சிகள் இதில் ஈடுபடுவதைத் தடுக்க விரும்பியிருந்தால், அரசியல் கட்சிகள் இதில் ஈடுபடக்கூடாது என்றும் இதற்குச் செலவு செய்யும் பணத்தை அரசின் நிதிக்கே வழங்க வேண்டும் என்றும் திட்டமிட்டிருக்கலாம்.
தொடர்ந்து, தன்னார்வ நிறூவனங்கள் மற்றும் நபர்கள் தங்களைக் குறித்து எந்த விளம்பரமும் செய்தல் கூடாது. சமூக இடைவெளியைப் பின்பற்றி வீடுகளுக்கே சென்று வேண்டுமானால் உதவிகளை வழங்கலாம். அதே சமயம், கிருமிநாசினிப் பயன்பாடும் உறுதி செய்துகொள்ளப்பட வேண்டும் என்று அறிவித்திருக்கலாம்.
தொழிலதிபர்கள், வணிகர்கள் இன்னபிற செல்வந்தர்களின் நிதி அரசுக்கு வர வேண்டும் என்றால், ஒரு குறிப்பிட்ட வரம்பெல்லை நிர்ணயித்து அதற்கு மேலான நிதியை அரசுக்குத்தான் அனுப்ப வேண்டும். பரிவர்த்தனைகள் கண்காணிக்கப்படுகின்றன. மீறீனால் தண்டிக்கப்படுவீர்கள் என்று அறிவித்திருக்கலாம்.
ஆனால், இப்படியாக ஏதும் இல்லாமல் வெறுமனே “வீடுகளுக்கே சென்று நிவாரணம் வழங்குவது நோய்த்தொற்றுப் பரவலை அதிகரிக்கும். எனவே யாரும் தாமாக உதவி செய்ய்யக் கூடாது. மீறீனால் சட்ட்ப்படி நடவடிக்கை எடுக்கப்படும்.” என்று மட்டும் மேலோட்டமாக அறிவிப்புச் செய்திருக்கிறது மாநில அரசு.
அவசர அவசரமாக அரசியல்பட்டு எடுக்கப்பட்ட இந்த முடிவால், அப்பாவி மக்களின் அடிவயிறு காய்வதற்கு ஏற்பாடு செய்திருக்கிறது மாநில அரசு என்ற விமர்சனத்துக்கும் ஆளாக நேரிடும்.
மீண்டும் மீண்டும் மக்கள் இதைத்தான் அரசுக்கு நினைவுபடுத்த வேண்டியகட்டாயத்தில் இருக்கின்றனர். இந்தியா போன்ற பெரு நாடுகளில் எல்லாவற்றையும் அரசே செய்துவிட முடியாது மக்கள் சக்தியும் தேவை. PPP போன்ற செயல்திட்டங்கள் வெளிப்படையாக அறிவிக்கும் முதல் செய்தி இதுதான். இப்படியிருக்க, மோசமான தற்போதைய சூழலில், நிலைமையை இன்னும் இன்னும் மோசமாக்கப் போகிறது இந்த அறிவிப்பு என்பது மட்டும் கண்கூடு.
கருத்துகள் இல்லை:
கருத்துரையிடுக