வாட்சப் மூலம் சமையல் சிலிண்டர்களை பதிவு செய்வதற்கான புதிய அம்சத்தை பாரத் பெட்ரோலியம் நிறுவனம் அறிமுகப்படுத்தியுள்ளது.

எரிபொருள் துறையில் நாட்டிலேயே இரண்டாவது மிகப்பெரிய நிறுவனமான பாரத் பெட்ரோலியம் கார்பரேஷன், தனது வாடிக்கையாளர்கள் வாட்சப் மூலமாக சமையல் சிலிண்டர் பதிவு செய்ய புதிய வசதியை அறிமுகப்படுத்தியுள்ளது. நாடு முழுவதும் இந்த வசதி நடைமுறைப்படுத்தப்படுவதாக பாரத் பெட்ரோலியம் நிறுவனம் அறிவித்துள்ளது.

பாரத் பெட்ரோலியம் நிறுவனத்தின் சமையல் சிலிண்டர் தொழிலில் நாடு முழுவதும் 7.1 கோடி வாடிக்கையாளர்கள் உள்ளனர். இந்நிலையில், நாடு முழுவதும் உள்ள வாடிக்கையாளர்கள் மே 26ஆம் தேதி முதல் வாட்சப் மூலமாகவே சமையல் சிலிண்டர்களை பதிவு செய்துகொள்ளலாம் என பாரத் பெட்ரோலியம் நிறுவனம் நேற்று வெளியிட்ட அறிக்கையில் தெரிவித்துள்ளது. சமையல் சிலிண்டர் பதிவுகளுக்காக தனியாக வாட்சப் தொழில் பிரிவை அறிமுகப்படுத்தியுள்ளதாகவும் பாரத் பெட்ரோலியம் நிறுவனம் தெரிவித்துள்ளது.

வாட்சப் மூலம் சமையல் சிலிண்டர்களை பதிவு செய்வது எப்படி? பாரத் பெட்ரோலியம் நிறுவனத்தில் வாடிக்கையாளர்கள் பதிவு செய்துள்ள மொபைல் எண் மூலமாக வாட்சப்பில் 1800224344 என்ற எண் வாயிலாக எல்பிஜி சிலிண்டர்களை புக் செய்யலாம். வாட்சப்பில் புக்கிங் செய்த பிறகு வாடிக்கையாளருக்கு புக்கிங்கை உறுதிப்படுத்த ஒரு மெசேஜ் (confirmation message) அனுப்பப்படும். மேலும், கட்டணம் செலுத்துவதற்கான லிங்க் அனுப்பப்படும்.

வாடிக்கையாளர்கள் டெபிட் கார்டு, கிரெடிட் கார்டு, யூபிஐ அல்லது இதர டிஜிட்டல் பரிவர்த்தனை தளங்கள் மூலம் கட்டணத்தை செலுத்தலாம். இதுமட்டுமல்லாமல், சிலிண்டர் ட்ராக்கிங், வாடிக்கையாளர்களின் கருத்துகளை கேட்க புதிய அம்சங்களை அறிமுகப்படுத்தவுள்ளதாகவும் பாரத் பெட்ரோலியம் நிறுவனம் தெரிவித்துள்ளது.

ஏற்கெனவே விநியோகர்கள், மிஸ்டு கால், ஐவிஆர், இணையதளம், ஆப் மூலம் சமையல் சிலிண்டர்களை பதிவு செய்வதற்கான வசதிகள் நடைமுறையில் இருக்கின்றன. தற்போது கூடுதலாக வாட்சப் வசதியை பாரத் பெட்ரோலியம் அறிமுகப்படுத்தியுள்ளது.