தமிழ்நாட்டில் ஊரடங்கு தளர்த்தப்பட்டு, பல்வேறு மாவட்டங்களில் அரசு பேருந்து போக்குவரத்தை மாநில அரசுத் தொடங்கியது. இந்த முடிவு மிகவும் ஆபத்தானது என பல்வேறு துறை வல்லுநர்கள் முன்பே எச்சரித்திருந்த நிலையில், இப்போது அரசு பேருந்து நடத்துநர்களுக்கு கொரோனா பரவத் தொடங்கியுள்ளது.
ஆம், பல்வேறு மாவட்டங்களில் உள்ள பேருந்து ஓட்டுநர்கள், நடத்துநர்களுக்கு கொரோனா உறுதியான நிலையில், இப்போது திருவண்ணாமலை மாவட்டம் செய்யாறு வட்டம் பணிமனையைச் சேர்ந்த 5 நடத்துநர்களுக்கு கொரோனா இருப்பது உறுதியாகியுள்ளது.

இதன் காரணமாகக் குறித்த பணிமனை மூடப்பட்டுக் கண்காணிப்பைச் சுகாதாரத் துறை அதிகாரிகள் முடக்கி விட்டுள்ளனர். ஊரடங்கு காலத்தில் மருத்துவர்கள், சுகாதாரத் துறை ஊழியர்கள், பணியாளர்கள், போலீஸ், அரசு அதிகாரிகளுக்குத் தீவிரமாகப் பரவி வந்த கொரோனா தொற்று இப்போது ஊரடங்கு தளர்வு காரணமாக சமூகத்தில் தீவிரமாகப் பரவி வருகிறது.

கடை உரிமையாளர்கள், பேருந்து நடத்துநர்கள் என மக்கள் நேரடி தொடர்பு வைத்திருப்பவர்களுக்குத் தொற்று பரவத் தொடங்கியுள்ளது. இந்த நிலைத் தொடர்ந்தால் சமூகத் தொற்றாக மாற வாய்ப்புள்ளதாக சமூக ஆர்வலர்கள் கருத்து தெரிவிக்கின்றனர்.

இது தொடர்பாக முன்பே எச்சரிக்கை விடுத்திருந்த உலக சுகாதார மையம், கொரோனா பரிசோதனைகளை 100 சதவீதம் மேற்கொள்ளாமல் ஊரடங்கைத் தளர்த்த வேண்டாம் என அறிவித்திருந்தது. இப்போதுகூட இங்கிலாந்தில் ஜூலை 4ஆம் தேதி முதல் ஊரடங்கில் தளர்வுகளை மேற்கொள்ள அந்நாட்டு அரசுத் திட்டமிருந்ததற்கு உலக சுகாதார மையம் எச்சரிக்கை விடுத்திருந்தது.

ஆனால் தமிழ்நாட்டில் அரசின் நடவடிக்கை, மக்கள் இயல்பாக எந்த பயமுமின்றி நடமாட வழிவகை செய்திருக்கிறது. அதே வேளையில், தமிழ்நாட்டில் தலைநகரைத் தவிர்த்துப் பிற மாவட்டங்களில் கொரோனா பரிசோதனை முறையாக மேற்கொள்ளப்படுவதில்லை என சமூக ஆர்வலர்கள் குற்றம்சாட்டுகின்றனர்.

இதே நிலைத் தொடர்ந்தால், மக்களின் உயிர்கள் அதிகளவில் பறிபோகும் சூழல் உருவாகும் என எச்சரிக்கும் சுகாதார ஆர்வலர்கள், அரசு மீண்டும் ஊரடங்கைத் தீவிரப்படுத்த வேண்டும் என்ற கோரிக்கையையும் முன் வைக்கின்றனர்