ஸ்டான் என செல்லமாக அழைக்கப்படும் டைனோசர் எலும்புக்கூடு 31.8 மில்லியன் டாலருக்கு விலைபோனது.

குறைந்தது 14 கோடி ஆண்டுகளுக்கு முன் வாழ்ந்த டைனோசரின் எலும்புக்கூடு 31.8 மில்லியன் டாலருக்கு விலைபோனது. ஸ்டான் என்று அழைக்கப்படும் டி-ரெக்ஸ் எலும்புக்கூட்டின் எதிர்பார்க்கப்பட்ட 8 மில்லியன் டாலரை காட்டிலும் நான்கு மடங்கு உயர்ந்து 31.8 மில்லியன் டாலருக்கு விலைபோனது.

நேற்று நடைபெற்ற ஏலத்தில் 20 நிமிடங்களுக்கு கடும் போட்டி ஏற்பட்டது. டைனோசர் எலும்புக்கூட்டுக்கு 3 மில்லியன் டாலர் அறிமுக விலையாக அறிவிக்கப்பட்டது. குறைந்தது 8 மில்லியன் டாலருக்கு விற்பனையாகிவிடும் என்று எதிர்பார்க்கப்பட்டது.

இந்த சூழலில், லண்டன், நியூ யார்க் என பல நகரங்களில் இருந்து ஏராளமானோர் விலை கேட்கவும் மளமளவென விலை உயரத் தொடங்கியது. இறுதியாக நியூ யார்க்கில் 31.8 மில்லியன் டாலருக்கு விற்பனை செய்யப்பட்டது. இந்த டைனோசர் எலும்புக்கூட்டை வாங்கியவர் யார் என்ற தகவல் வெளியாகவில்லை.

ஸ்டான் போல டைனோசரின் முழு எலும்புக்கூட்டையும் தொல்லுயிர் ஆராய்ச்சியாளர்கள் கண்டுபிடிப்பது மிகவும் அரிது. ஒரு முழுமையான டைனோசர் எலும்புக்கூடு என்பதால் இதற்கு கடுமையான டிமாண்ட் இருந்தது.

இதற்கு முன் 1997ஆம் ஆண்டில் சூ என்று அழைக்கப்பட்ட மற்றொரு டி-ரெக்ஸ் டைனோசர் எலும்புக்கூடு 8.36 மில்லியன் டாலருக்கு விற்பனை செய்யப்பட்டது. அந்த எலும்புக்கூட்டை சிகாகோவை சேர்ந்த இயற்கை வரலாறு அருங்காட்சியகம் விலைக்கு வாங்கியது.

இந்த எலும்புக்கூடு 13 அடி உயரம், 40 அடி நீளம் கொண்டது. கடந்த இருபது ஆண்டுகளாக இதை ஆய்வு செய்த ஆய்வாளர்கள் இந்த டைனோசர் ஒரு போராளி என்று கூறுகின்றனர். அதாவது, அதன் காலத்தில் மற்ற டைனோசர்களின் தாக்குதல்களை இது வெற்றிகரமாக சமாளித்துள்ளதாக கூறுகின்றனர்.