அரசன் ஒருவன் தன் மக்கள் நலப்பணிகளைச்
செயல்படுத்த மூன்று அதிகாரிகளை நியமித்து, அவர்களுக்கு அமைச்சருக்குச் சமமான
ஊதியத்தையும், அந்தஸ்தையும் வழங்கினார். மக்கள் நலப்பணிகளில் ஊழல் நடப்பதாகப்
புகார்கள் குவிந்தன. அதிகாரிகளைக் அழைத்து விசாரித்தான். ஐயோ மன்னா! மக்களுக்காகவே
தியாக வாழ்க்கை வாழ்ந்து கொண்டிருக்கிறோம் என்று கூறினார்கள். இந்த மூவரையும் மன்னன்
பரிசோதிக்க நினைத்தான்.
இரண்டு
நாட்கள் கழித்து அதிகாரிகள் மீண்டும் அழைக்கப்பட்டார்கள். மக்கள் பணியில்
இருக்கும் உங்களுக்கு களப்பயிற்சி தரப் போகிறேன். உங்களிடம் ஒரு பெரிய சாக்கு
தரப்படும். அதை எடுத்துக்கொண்டு நம் நாட்டின் எல்லைகளில் உள்ள காட்டுப் பகுதிகளுக்குச்
செல்லுங்கள். உங்களிடம் கொடுக்கப்பட்டிருக்கும் சாக்குகளை காய், கனி, கிழங்குகளால்
நிரப்ப வேண்டும். அப்படி நீங்கள் நிரப்பும் பொருட்களை வைத்துக்கொண்டு ஒரு மனிதன்
இரண்டு வாரம் சாப்பிட வேண்டும்.
நீங்கள்
கொண்டு வரும் சாக்குகளை நாங்கள் யாரும் பரிசோதிக்க மாட்டோம் என்றான். மறுநாள்
மூவரும் வௌ;வேறு காடுகளுக்கு அனுப்பப்பட்டார்கள். காடுகளில் காய் கனி கிழங்குகளை
அலைந்து திரிந்து சேகரிக்க வேண்டியிருந்தது. மூன்று அதிகாரிகளும் அரண்மனை போன்ற
வீடுகளில் சொகுசாக வாழ்ந்து பழகியவர்கள்.
அதனால்
அவர்களுக்கு அந்த வேலை மிகவும் கடினமாக இருந்தது. முதல் அதிகாரி நல்ல பொருட்களைச்
சேகரித்தார். சாக்குப்பையை நிரப்ப அவருக்கு மூன்று, நான்கு நாட்கள் தேவைப்பட்டது.
ஆனால், உள்ளே இருந்தவை எல்லாம் தரமான பொருட்கள். இரண்டாமவர் கொஞ்சம் குறுக்கு
வழியில் யோசித்தார். பையை யாரும் சோதிக்க மாட்டார்கள் என்று மன்னரே
சொல்லிவிட்டார். சோதித்தாலும் மேலோட்டமாகத்தான் பார்ப்பார்கள். மேலே நல்ல தரமான
பொருட்களை வைத்துவிடலாம். கீழே அழுகிய பழங்கள், கொட்டைகள், என்று வைத்துவிட்டால்
யாருக்கு என்ன தெரியப் போகிறது? என்று எண்ணி அப்படியே செய்த அந்த நபர், ஒரே நாளில்
தன் பணியை முடித்துவிட்டார்.
மூன்றாம்
அதிகாரி, பைக்குள் என்ன இருக்கிறது என்பதை யார் பார்க்கப் போகிறார்கள் என்ற
நினைப்பில் காய்ந்த இலைகளையும், சருகுகளையும் போட்டு பையை நிரப்பி அரண்மணையில்
சேர்த்துவிட்டார். ஒரு நாழிகைப் பொழுதில் வேலையை முடித்துவிட்டார்.
மன்னன்
மூன்று அதிகாரிகளையும் அழைத்து இந்த மூவரையும் தனித்தனியாகப் பாதாளச் சிறையில்
அடையுங்கள். அவரவருடைய சாக்குப் பைகளை அவரவரிடம் வைத்துவிடுங்கள். சிறைத்தண்டனை
இரண்டு வாரங்கள் தொடரும். அவர்கள் சேகரித்த காய் கனி கிழங்கு வகைகள்தான்
அவர்களுக்கு உணவு, வேறு எந்த உணவும் வழங்க வேண்டாம் என்றான்.
மூன்றாம்
அதிகாரியால் காய்ந்த இலைகளையும் சருகுகளையும் உண்டு உயிர் வாழ முடியவில்லை. ஐந்தே
நாட்களில் அவர் பசி தாங்காமல் மாண்டுவிட்டார். இரண்டாமவரோ அழுகிய கனிகளையும், நல்ல
கனிகளையும் கலந்து உண்டு எப்படியோ இரண்டு வாரங்கள் உயிர் வாழ்ந்துவிட்டார். ஆனால்,
அவர் உடல்நலம் கெட்டுவிட்டது. மன்னன் அவரைப் பதவியிலிருந்து நீக்கிவிட்டான்.
முதலாம்
அதிகாரி இரண்டு வாரங்களையும் தனிமைச்சிறையில் மகிழ்ச்சியாகக் கழித்துவிட்டு வெளியே
வந்தார். தான் சேகரித்த தரமான காய் கனி கிழங்குகளை உண்டு இன்னும் அதிகமான
தெளிவுடன் வெளியே வந்தார். மன்னன் அவனுக்குப் பல பரிசுகளைக் கொடுத்து அவனை
முதலமைச்சர் ஆக்கிக் கொண்டான்.
ஒருவன்
செய்யும் வினையின் பயனானது அவன் எங்கிருந்தாலும் அவனைக் கண்டுபிடித்து அவனைச்
சென்றடைந்துவிடும். உங்கள் செயலின் பலனை நீங்கள்தான் அனுபவிக்க வேண்டும். இது
மனிதன் இயற்றிய சட்டம் இல்லை இறைவன் வகுத்த நியதி.
கருத்துகள் இல்லை:
கருத்துரையிடுக