உடல் எடை குறைய நினைப்பவர்கள் முதலில் தேர்வு செய்வது உடற்பயிற்சி தான். அதன் பிறகே உணவில் கவனம் செலுத்துவதுண்டு.

உடல் எடை குறைய முயற்சிக்கும் போது முதல் தேர்வு உடற்பயிற்சியாக இருக்கும். அதை தொடர்ந்து உணவில் கவனம் என்பது தான் பலரும் கடைபிடிக்கும் செயல்.இவை நல்லதுதான். ஆனால் இதை சரியான முறையில் செய்தால் மட்டுமே பலன் கிடைக்கும். ஏனென்றால் முறையற்ற உடற்பயிற்சி, உணவு முறை எல்லாமே பயனற்றதாக்கிவிடும்.

ஒரே அடியாக உணவில் மாற்றத்தை கொண்டு வராமல் படிப்படியாக உணவு முறையில் மாற்றம் கொண்டுவருவது எடை இழப்புக்கு நிச்சயமாக உதவக்கூடும். குறிப்பாக காலை உணவை காட்டிலும் இரவு உணவில் கூடுதல் கவனம் செலுத்த வேண்டும். உங்கள் எடை இழப்பு ஆவதில் ஏன் தாமதம் உண்டாகிறது என்பது குறித்து பார்க்கலாம்.

​எடை இழப்பின் போது உணவு

ஒவ்வொருவரும் அதிக உடல் எடையை கொண்டிருக்கும் போது உடல் எடை குறைப்பில் பெருங்கவனத்தோடு ஈடுபடுவதுண்டு. ஆனால் கடுமையான முயற்சிக்கு பிறகு எடை இழப்பு என்பது மெதுவாக இயங்குகிறது என்றால் அதற்கு காரணங்கள் உங்கள் உடற்பயிற்சி அல்லது உணவு முறை முறையற்று இருக்கலாம்.

உடல் எடை குறைப்பில் மிக முக்கியமானது உடற்பயிற்சியும் உணவும் தான். ஆனால் பலரும் காலை உணவை தவிர்த்துவிடுவது உண்டு. ஆனால் எடை இழப்பு வரும் போது மூன்று வேளையும் முக்கியமே.. காலை உணவை எக்காரணம் கொண்டு தவிர்க்க கூடாது. இது நாள் முழுக்க அமிலத்தன்மையை உண்டாக்கும்.

அதனால் நாள் முழுக்க வேலை செய்வதற்கான ஆற்றல் குறையும். அதனால் உணவை தவிர்க்காமல் குறைந்த கலோரி உணவை எடுத்துகொள்வது அவசியம். இரவு உணவுகளிலும் கவனம் செலுத்துவது அவசியம். அப்படி நீங்கள் கவனிக்க வேண்டிய விஷயங்கள் என்னென்ன என்று பார்க்கலாம்.

​இரவு உணவு எப்போது?

இரவு நேரத்தில் உணவை தவிருங்கள் என்று எந்த ஊட்டச்சத்து நிபுணரும் பரிந்துரைக்க மாட்டார்கள். ஆனால் இரவு உணவு உண்ணும் நேரம் என்பது இங்கு கவனிக்க வேண்டும். ஊட்டச்சத்து மற்றும் சுகாதார நிபுணர்களின் வலியுறுத்தலின் படி இரவு உணவை உங்களது தூக்கத்தின் 3 அல்லது 4 மணி நேரங்களுக்கு முன்பு முடித்துவிட வேண்டும்.

நீங்கள் 10 மணிக்கு தூங்கும் பழக்கத்தை கொண்டிருந்தால் இரவு 7 மணிக்கு உங்கள் இரவு உணவை முடித்துவிட வேண்டும். குறிப்பாக கார்போஹைட்ரேட் இல்லாத உணவுகளை கண்டிப்பாக தவிர்க்க வேண்டும். அதே போன்று தூங்குவதற்கு முன்பு சிற்றுண்டிகள் ஏதேனும் எடுத்துகொள்வதையும் தவிர்க்க வேண்டும்.

​கண்ணுக்கும் மூளைக்கும் தொடர்பு

உணவு உண்ணும் போது நாவை காட்டிலும் கண்களும் வயிறு நிறைந்த உணர்வை உண்டாக்குவதில் மூளைக்கும் பெரிய பங்குண்டு. அதனால் தான் பல சமயங்களில் உணவு போதுமானதாக எடுத்துகொண்டாலும் வயிறு நிறையவில்லை என்று மூளையின் சமிக்ஞையை ஏற்று உணவை அதிகரிக்க செய்கிறோம். உணவு வயிற்றுக்குதான் என்பதால் மூளையையும், கண்களையும் கட்டுப்படுத்தும் மனோபாவத்தை அதிகரிக்க செய்யவேண்டும்.

அதிகம் மெனக்கெட வேண்டியதில்லை. ஒரு கப் அளவு தான் உணவு என்றாலும் சிறிய தட்டில் வைத்துகொள்ளுங்கள். கண்கள் பார்க்க பார்க்க சட்டென்று தட்டை மீறி இவ்வளவு உணவா என்று நினைக்க தோன்றும். அதே போன்று மூளைக்கும் நம் உடலில் இருந்து செல்லகூடிய சமிக்ஞையும் நிறைய உணவு என்பதை உணர்த்தும். பெரிய தேக்கரண்டியில் சிறிய தட்டில் உங்கள் உணவை நிறைத்தால் வயிற்றோடு கண்களும் அதை தொடர்ந்து மூளையும் கூட போதும் என்னும் பக்குவத்தை உங்களுக்கு அளித்துவிடும்.

​பசி எடுக்காத உணவு

குறைவாக சாப்பிடும் போது பசி உணர்வு இல்லாமல் இருக்க வேண்டும். ஏனெனில் உடல் எடை குறைப்பில் உண்ணும் அளவே குறைவாக இருக்கும் போது கண்டிப்பாக இரவு நேரத்தில் இடையில் பசி எடுக்கவே செய்யும். அதனால் உணவை தேர்வு செய்யும் போது செரிமானம் அதிகமாக்கும் உணவை எடுத்துகொள்வது நல்லது. இது உணவில் இருக்கும் குளுக்கோஸை மெதுவாக ரத்த ஓட்டத்தில் கலக்க செய்யும். பசி உணர்வும் அதிகமாக இருக்காது.

இரவு உணவில் சுத்திகரிக்கப்படாத காரோஹைட்ரேட்டுகள் மற்றும் புரத உணவுகள் செரிமானத்துக்கு அதிக நேரம் உண்டாக்கும். இதனால் நள்ளிரவில் எழுந்து சிற்றுண்டியை தேடி ஓட வேண்டியதில்லை. உங்கள் முழுமையான இரவு உணவில் சீஸ், பயறு வகைகள் சேர்வது பெரிதும் துணை நிற்கும்.

​மதிய உணவுக்கு பிறகு சிற்றுண்டி

இரவு உணவுக்கு பிறகு சிற்றுண்டி தவிர்ப்பது சரி. ஆனால் மதிய உணவுக்கு பிறகு இரவு உணவுக்கான இடைவெளி கொஞ்சம் அதிகம் என்பதால் நீங்கள் இரவில் அதிகமாக சாப்பிட்டு விடக்கூடும். அதனால் இரவு உணவுக்கு முன்பு மதிய உணவுக்கு பின்பு இடைப்பட்ட நேரத்தில் இலேசான சிற்றுண்டி எடுத்துகொள்ள வேண்டும். அதே நேரம் இரவு உணவில் குறைந்த கலோரி எடுத்துகொள்வதையும் உறுதி செய்யுங்கள். இதனால் இரவு உணவு அதிகம் எடுப்பது தடுக்கப்படும். அதோடு உணவுக்கு பின்பு சிற்றுண்டி எடுக்க வேண்டிய அவசியமும் இருக்காது.

​எப்படி சாப்பிட வேண்டும்

உணவில் கவனம் செலுத்துவது அவசியம் என்று சொல்ல காரணம் உண்டு. உணவு எடுத்துகொள்ளும் போது வேறு கவனம் இருக்க கூடாது. குறிப்பாக டீவி பார்த்துகொண்டு சாப்பிடும் போது அதிக நேரம் சாப்பிடுவீர்கள். அதிகமாகவும் சாப்பிடுவீர்கள். அப்போது குறைவாக கலோரி எடுப்பதை விட அதிகமாக எடுத்துகொள்வீர்கள்.

இது உங்கள் எடை குறைப்பிற்கும் உதவாது. கூடுதலாக உங்கள் உடல் எடையை அதிகரிக்கவே செய்துவிடும். உணவின் போது அமைதியை உணர்ந்தால் ஏதேனும் பாடல்களை கேட்டபடி சாப்பிடலாம்.

நீங்கள் உடல் எடை குறைப்பில் ஈடுபட்டிருந்தால் ஒருவேளை உங்கள் உணவு முறை மேற்கண்ட குறிப்புகளோடு ஒத்துவந்தால் கண்டிப்பாக நீங்கள் இதை மாற்றி கொள்ள வேண்டும். அப்போதுதான் உடல் எடை இழப்பும் சாத்தியமாகும்.