பிறந்த குழந்தை தாய்ப்பால் குடிக்கும் போதே குழந்தையின் ஈறு பகுதியை அவ்வபோது சுத்தம் செய்ய வேண்டும். அதே போன்று பால் பற்கள் முளைக்க தொடங்கும் போதும் சுத்தம் செய்ய வேண்டும். முழுமையாக பற்கள் வந்த பிறகு குழந்தைக்கு உரிய பிரஷ், அவர்களக்கென்று பிரத்யேகமாக பற்பசையை கொண்டு பல் துலக்க பழகவேண்டும்.

அம்மாக்கள் குழந்தைக்கு எப்படியும் பற்கள் விழுந்து முளைக்கவே தொடங்கும் என்பதால் பால் பற்களை சுத்தம் செய்வதற்கு சுணக்கம் காட்டுவார்கள். ஆனால் குழந்தை மென்று ருசியை அனுபவிக்கும் இந்த வயதில் பற்களின் பராமரிப்பு மிகவும் அவசியமானது. பால் பற்களை சரியாக பராமரித்தால் தான் அடுத்து வரும் பற்கள் வலுவாக ஆரோக்கியமாக இருக்கும்.

குழந்தை தாய்ப்பால் குடித்த பிறகும் குழந்தையின் வாய்ப்பகுதி, கன்னம், உதடு பகுதியை மெல்லிய வெள்ளைதுணியால் துடைத்து சுத்தம் செய்யவேண்டும். தாய்ப்பால் பட்ட உதடை துடைக்காவிடில் உதடும் கருமையாக இருக்கும். அதே போன்று குழந்தையை குளிக்க வைக்கும் போதெல்லாம் குழந்தையின் நாக்கில் இருக்கும் வெள்ளை படிந்த மாவை சுத்தமான வெள்ளை துணி கொண்டு துடைத்து எடுக்க வேண்டும். அப்படியே குழந்தையின் ஈறுபகுதியை மென்மையாக சுத்தம் செய்து விடவும்.

குழந்தைக்கு ஆறுமாதம் ஆகும் போது பல் ஓரளவு முளைத்திருக்கும். இதற்கு பிரத்யேகமான ஃபிங்கர் பிரஷ் கடைகளில் கிடைக்கும். அதை வாங்கி பயன்படுத்தலாம். மென்மையான இந்த பிரஷ்ஷால் குழந்தைக்கு இதமாக இருக்கும். பிறகு வாய்கொப்புளிப்பதையும் பழக்கிவிடுங்கள். குழந்தையின் ஒரு வயதுக்குள் பற்கள் ஓரளவு முளைத்திருக்கும். பிறகுகுழந்தைகளுக்கென்று கிடைக்கும் பிரத்யேகமான பிரஷ் கொண்டு குழந்தையின் கைபிடித்து பழக்கலாம்.

வெறும் பிரஷ்ஷால் மட்டும் பற்களை துலக்கினாலே போதுமானது. குழந்தைக்கு 2 வயதாகும் வரை பேஸ்ட் பயன்படுத்த வேண்டாம். அது குழந்தைகளுக்கான பிரத்யேகமான பேஸ்ட் வகையாக இருந்தாலும் கூட. குழந்தைக்கு 2 வயதான பிறகு மருத்துவரின் ஆலோசனையோடு குழந்தைக்கான பேஸ்ட்டை சிறு பருப்பு அளவு வைத்து அவர்களையே தேய்க்க பழக வேண்டும்.

பிள்ளைகள் அதிகம் சாக்லெட், க்ரீம் பிஸ்கட், இனிப்புகளை அதிகம் சாப்பிடுவதால் அவர்களது பற்கள் விரைவில் பாதிப்புக்குள்ளாகும். அதனால் தினமும் இரண்டு வேளையும் குழந்தைகளை பல் துலக்க பழக வேண்டும். இதனால் பால் பற்களாக இருந்தாலும் சொத்தை ஈறு தொற்று போன்ற பிரச்சனைகள் வராமல் காக்க முடியும்.

பிள்ளைகள் 3 வயது வரை கூட பால் பாட்டிலில் பால் குடிப்பதுண்டு.குறிப்பாக இரவு நேரங்களில் பால் புட்டியை வைத்து கொண்டு தூங்கும் போது பாலில் இருக்கும் இனிப்பு பல்லில் பாக்டீரியாக்களை உண்டாக்கும். தினமும் இப்படி தொடர்ந்தால் பல் சொத்தை நிச்சயம் சந்திப்பார்கள். அதனால் குழந்தைகளுக்கு இரவில் பால் கொடுத்தவுடன் வாய் கொப்புளிக்க வைத்து தூங்க வைத்து பழக வேண்டும். இப்படி செய்வதன் மூலம் குழந்தைகள் வளர்ந்த பிறகும் இனிப்பு சாப்பிட்ட பிறகு வாய் கொப்புளிக்க செய்வார்கள். பகல் நேரங்களிலும் சாக்லெட், இனிப்பு வகைக்கு பிறகு வாய் கொப்புளிக்க பழகுவதும் அவசியம்.

பால் பற்கள் தான் பாதிப்புக்குள்ளாகிறது என்றாலும் கூட இவை தான் அடுத்துவரும் நிரந்தரமான பற்களை தனக்கி நிற்கும் சக்தியை ஈறுகளுக்கு கொடுக்கின்றன. அதனால் இதை வலுவாக வைத்திருந்தால் தான் அடுத்து முளைகும் நிரந்தரமான பற்கள் வலுவாக இருக்கும். அதனால் பிரஷ் செய்ய பழக்கும் போதே உரிய முறையில் பழக்க வேண்டும்.

குழந்தைகள் பிரஷ் செய்யும் போது முன் வரிசை மேற்பற்கள், முன் வரிசை கீழ் பற்களை மெதுவாக மென்மையாக தேய்க்க சொல்லுங்கள். பிறகு வாயை அகலமாக திறந்து மேல்வரிசை பற்களின் உள்புறம், கீழ் வரிசை பற்களின் உள்புறம் என்று பொறுமையாக அங்கும் தேய்க்க சொல்லுங்கள். இப்படி பல் தேய்க்கும் போது நான்கு பகுதியிலும் பற்களை சுத்தமாக தேய்க்க வேண்டும் என்று அருகில் இருந்து தினமும் கற்றுகொடுங்கள். ஆரம்பத்தில் அடம்பிடித்தாலும் குழந்தை போக போக எளிதாக கற்றுகொள்ளும்.

எளிதாக கற்றுகொள்ளும்.

அதன் பிறகு குழந்தைக்கு வாய் கொப்புளிக்க கற்றுத்தரவேண்டும். பெரிய ஜக்கை குழந்தையின் கையில் கொடுக்காமல் சிறிய டம்ளரில் குறைந்த அளவு நீர் பிடித்து கொடுங்கள். முதலில் எப்படி வாய் கொப்புளிப்பது என்று நீங்கள் செய்து காண்பித்து பிறகு குழந்தையை பழக்குங்கள். நீங்கள் செய்வதை பார்த்து குழந்தை மெதுவாக பழகும். குழந்தையின் 3 வயது முதல் அவர்களையே பல் தேய்க்க பழகவிடலாம். ஆனால் நீங்கள் உடனிருந்து வழிகாட்டினால் தான் அவர்கள் அடம்பிடிக்காமல் பழகுவார்கள்.

பல் தேய்க்க அடம்பிடிக்கும் குழந்தைகளை வழிக்கு கொண்டு வர அவர்கள் விரும்பும் நிறத்தில் பிரஷ் வகைகளை வாங்கி கொடுக்கலாம். மூன்று மாதங்களுக்கு ஒரு முறை பிரஷ் மாற்றுவதையும், மென்மையான பிரஷ்ஷாக வாங்குவதையும் மட்டும் கவனித்து செய்யுங்கள். அதே போன்று சிறு குழந்தைகள் இருக்கும் வீட்டில் குளோரைடு அதிகம் இருக்கும் பேஸ்ட் வகைகளை பயன்படுத்த வேண்டும். குழந்தைகள் முதல் 12 வயது வரை இருப்பவர்களுக்கு பிரத்யேகமான பேஸ்ட் உண்டு. அதை மட்டும் வாங்கி பயன்படுத்துங்கள்.